बस्टन । अमेरिकाको म्यासाच्युसेट्स राज्यमा ‘स्टेट अफ इमरजेन्सी’को घोषणा गरिएको छ । म्यासाच्युसेट्सकी गभर्नर मरा हिलीले राज्यमा स्टेट अफ इमरजेन्सीको घोषण गरेकी हुन् ।

द्रुत गतिमा बढेका आप्रवासी परिवारको आवश्यकताअनुसारको सेवा र वासस्थानको चरम अभाव हुँदा यस्तो इमरजेन्सीको घोषणा गर्नुपरेको गभर्नर हिलीको कार्यालयले जनाएको छ ।

यो घोषणाले संघीय सरकार र म्यासाच्युसेट्स राज्यलाई यहाँको वासस्थानको प्रणाली दिगो नहुने किसिमबाट बढिरहेको र तुरुन्तै थप सहयोग आवश्यक रहेको सूचित गरेको छ ।

अहिले राज्यका ‘सेल्टर’मा पाँच हजार ६०० परिवार (२० हजार व्यक्ति) छन् । बालबालिका र गर्भवती महिला पनि रहेको राज्यको आधिकारिक वेबसाइटमा उल्लेछ छ ।

गभर्नर हिलीले अमेरिकी गृह मन्त्रालयका सेक्रेटरी अलेहान्द्रो मायोर्कासलाई लेखेका पत्रमा ती परिवारलाई वासस्थान र सेवा उपलब्ध गराउनका लागि लगानी बढाउन संघीय सरकारसँग माग गरिएको छ ।

आप्रवासीका लागि वासस्थान र कामको आवश्यकता पूरा गर्न परोपकारी संस्था, अधिकारकर्मी, संगठन र सेवा प्रदायकलाई प्रशासनसँग सहकार्य जारी राख्न आग्रह गरिएको विज्ञप्तिमा जनाइएको छ ।

प्रशासनले हालै आप्रवासी सहयोग सेवा कार्यक्रम सार्वजनिक गरेको छ । त्यसले आप्रवासीका मुद्दाको व्यवस्थापन, कानुनी सेवा र परिवारलाई राज्यभित्रका वासस्थानमा सहयोग गर्ने जनाइएको छ ।