काठमाडौं । नेपाल नर्सिङ काउन्सिलको लाइसेन्स परीक्षामा प्रश्नपत्र आउट गरेको आरोपमा पक्राउ परेका तीनजना धरौटीमा रिहा भएका छन् ।

पक्राउ परेका तीनजनालाई जिल्ला अदालत काठमाडौंले जनही १० हजार रुपैयाँ धरौटीमा रिहा गरेको प्रहरी परिसर काठमाडौंका प्रवक्ता एवं एसपी कुुमुद ढुंगेलले जानकारी दिए ।

गएको असार २३ गते लिइएको परीक्षामा प्रश्नपत्र आउट गरेको आरोपमा कास्कीको लेखनाथकी २० वर्षीया समीक्षा थापा, लेखनाथकै २० वर्षीया भावना गुरुङ र धादिङको त्रिपुरासुन्दरीकी २३ वर्षीया सविना आलेलाई प्रहरीले पक्राउ गरेको थियो । गएको शुक्रबार उनीहरू रिहा भएका एसपी ढुंगेलले बताए ।

काउन्सिलले उनीहरू र अरू चारजना र नर्सिङ तयारी कक्षा पढाउने पोखरास्थित अलब्राइट इन्स्टिच्युटविरुद्ध जाहेरी दिएको थियो । प्रहरीका अनुसार बाँकी चारजनालाई फरार प्रतिवादी बनाइएको छ । घटनाको अनुसन्धान प्रतिवेदन काउन्सिललाई बुझाइसकेको प्रहरीले जनाएको छ ।

असार २३ गतेको लाइसेन्स परीक्षा चलिरहेका बेला अल ब्राइट इन्स्टिच्युटको म्यासेन्जर ग्रुपमा प्रश्नपत्र पठाइएको र सो म्यासेज केही समयमै ४०० भन्दा बढी व्यक्तिले ‘सिन’ गरेको पाइएको काउन्सिलकी अध्यक्ष सरला केसीले बताइन् ।

सोही दिन बालाजुस्थित सिद्धार्थ वनस्थली इन्स्टिच्युट, ललितपुरस्थित लिटिल एन्जल्स स्कुल र वाग्मती कलेज काठमाडौं केन्द्रबाट प्रश्नपत्र बाहिरिएको थियो । सो दिनको परीक्षा नतिजा काउन्सिलले एक महिना स्थगित गरी आइतबार (आज) मात्र सार्वजनिक गरेको छ ।

• प्रश्नपत्र बाहिरिएर रोकिएको नर्स लाइसेन्सको नतिजा एक महिनापछि सार्वजनिक