काठमाडौं । काठमाडौंको व्यापारिक केन्द्र न्युरोड हरेक दिन चलायमान हुन्छ । बिहानदेखि राति १० बजेसम्म किनमेल गर्नेको भीड देखिन्छ ।

यही साउन १६ गते पनि न्युरोडको दृष्य उस्तै थियो । दिउँसो साढे १ बजेको समयमा सडकमा सवारीसाधनको चाप नै थियो ।

त्यही बेला घरको आठौँ तलाबाट एक पुरुष अकस्मात् भुईंमा बजारिए । त्यसरी बजारिएका पुरुष थिए, ५५ वर्षीय सञ्जय गुप्ता ।

प्रहरी वृत्त जनसेवाको टोलीले गुप्तालाई तत्काल उपचारका लागि केही दूरी पर रहेको वीर अस्पतालमा पुर्‍यायो । लगत्तै अस्पतालले गुप्तालाई मृत घोषित गर्‍यो । स्थानीयवासीले गुप्ता घरको छतबाट खसेको अनुमान गरेका थिए ।

तर, प्रहरीको अनुसन्धानमा उनले आत्महत्या गर्न आफ्नै घरको आठौँ तलाबाट हामफालेको खुलेको छ । कपडा व्यापारी गुप्ताको न्युरोडमा आठतले घर र गैरीगाउँमा समेत अर्को घर छ ।

प्रहरी वृत्त जनसेवाका प्रमुख एवं डीएसपी भेषराज रिजालका अनुसार न्युरोडको घर गुप्ताले व्यापारिक प्रयोजनका लागि प्रयोग गरेका थिए । त्यही घरबाट हामफालेर आत्महत्या गरेको प्रहरीको प्रारम्भिक अनुसन्धानका क्रममा खुलेको उनले बताए ।

“हाम्रो प्रारम्भिक अनुुसन्धानले गुप्ताले आत्महत्या गरेको देखिएको छ । हामी थप अनुसन्धानमै छौँ । गुप्ताले प्रयोग गर्ने मोबाइल परीक्षणको लागि प्रहरीको डिजिटल फरेन्सिक ल्याबमा पठाएका छौँ,” डीएसपी रिजालले बाह्रखरीसित भने ।

परिवारका सदस्यले प्रहरीलाई दिएको जानकारीअनुसार गुप्ता केही समयअघिदेखि तनावमा देखिएका थिए । तर, के कति कारणले उनले ‘आत्महत्या’को बाटो रोजे, परिवारका सदस्य र प्रहरीले समेत कुनै ‘क्लु’ फेला पारेका छैनन् ।

आर्थिक समस्याका कारण गुप्ता तनावमा रहेको हुन सक्ने प्रहरीको अनुमान छ ।