काठमाडौं । प्रधानमन्त्री पुष्पकमल दाहाल ‘प्रचण्ड’ र उनका भारतीय समकक्षी नरेन्द्र मोदीबीच शनिबार टेलिफोन संवाद भएको छ । प्रधानमन्त्री प्रचण्डलाई मोदीले फोन गरेका हुन् ।

त्यसक्रममा द्विपक्षीय हितका विषयमा कुराकानी भएको भारतको प्रधानमन्त्रीको कार्यालयले जनाएको छ ।

प्रधानमन्त्रीद्वयले भारत–नेपाल द्विपक्षीय सहयोगका विभिन्न पक्षको समीक्षा गरेका थिए । द्विपक्षीय साझेदारीलाई अगाडि बढाउने र दुई देशबीचको सम्बन्धलाई थप सुदृढ बनाउने विषयमा छलफल भएको सो कार्यालयले जनाएको छ ।

प्रधानमन्त्री प्रचण्ड भारत भ्रमणमा रहेका बेला भएको छलफललाई ‘फलोअप’ गरिएको जनाइएको छ ।

यो टेलिफोन वार्ताले दुई देशबीचको उच्चस्तरीय आदानप्रदानको परम्परालाई निरन्तरता दिएको पनि सो कार्यालयले जनाएको छ ।