काठमाडौं । प्रमुख प्रतिपक्ष दल नेकपा (एमाले)का अध्यक्ष केपी शर्मा ओलीले प्रधानमन्त्री पुष्पकमल दाहाल ‘प्रचण्ड’को भारत भ्रमण सत्ता स्वार्थमा मात्रै केन्द्रित भएको टिप्पणी गरेका छन् । 

पूर्वप्रधानमन्त्रीसमेत रहेका अध्यक्ष ओलीले प्रधानमन्त्री प्रचण्डको भारत भ्रमणमा राष्ट्रिय स्वार्थप्रधान नभई सत्तास्वार्थ मात्रै भएको दाबी गरे । पार्टीको परराष्ट्र मामिला विभागले शनिबार काठमाडौंमा आयोजना गरेको ‘वर्तमान अन्तराष्ट्रिय परिस्थिति र नेपालको परराष्ट्र नीति सम्बन्धि नेकपा (एमाले) को धारणा’ विषयक विचार गोष्ठीमा उनले नेपाली आवश्यक्ता, नेपाली हित, नेपालको न्यायोचित पक्षमा हुनुपर्ने कुरामा प्रधानमन्त्री प्रचण्डले भारत भ्रमणमा धेरै कमजोरीे देखाएको जिकिर गरे । 

अध्यक्ष ओलीले ईपीजी प्रतिवेदन र नेपालको भूमिबारे समेत प्रधानमन्त्री प्रचण्डले भारतीय पक्षसँग कुनै कुरा गर्न नसकेको बताए । उनले राष्ट्रिय हितलाई सर्वोपरी राखेर मात्रै परराष्ट्र नीति तय गर्न आफूहरु सदैव तयार रहेको र रहिरहने अडान समेत राखे । 

सरकारले मनपरी अघि बढाएको परराष्ट्र सम्बन्धमा आफ्नो पार्टीको साथ नरहने ओलीको भनाइ छ । 

“रााष्ट्रिय हित छोडेर सहमति हुने कुरामा नेकपा एमाले तयार हुँदैन । नेपाली जनता पनि तयार हुन सक्दैनन् । हाम्रो दुईतिर दुईवटा ऐतिहासिक छिमेकीहरू छन्,” उनले भने, “छिमेकमा भएपछि समस्याहरू पैदा हुन सक्छन् । सिमानाको समस्या गैरछिमेकीहरूसँग हुँदैन । तसर्थ, हामीले हाम्रा छिमेकीलाई खुलस्त कुरा गरेर समस्याको समाधान खोज्नुपर्छ । आफना जायज हितबारे बोल्न सक्दैनौं भने त्यस्तो सत्ताको के अर्थ भयो, सरकारको के अर्थ भयो ?” 

अध्यक्ष ओलीले भारत र चीन दुई मित्र राष्ट्रहरु भएकाले उनीहरुसँग खुलस्त कुरा राखेर मात्रै आपसी समस्यालाई समाधान गर्न सकिनेमा जोड दिए ।