काठमाडौं । अमेरिकी अन्तरिक्ष अन्वेषण एजेन्सी नासाले आफ्नै स्ट्रिमिङ सेवा सुरु गर्ने भएको छ । यसै वर्षभित्र सार्वजनिक हुने भनिएको यो प्लेटफर्म विज्ञापनरहित र निःशुल्क हुने नासाले जनाएको छ ।

‘नासा प्लस’ नाम दिइएको यो प्लेटर्फममा भविष्यका प्रक्षेपण, डकुमेन्ट्री र ओरिजिनल सिरिज उपलब्ध हुनेछन् ।

“नासाको नयाँ प्लेटर्फमसहित हामी अन्तरिक्षलाई तपाईंले चाहेको बेला तपाईंको औँलाछेउ पुर्‍याउँदै छौँ,” नासाको सञ्चार विभागका निमित्त प्रशासक मार्क एट्किन्डले भने ।

नासा प्लस नासाको एन्ड्रोइड र आईओएस एपमा उपलब्ध हुने र रोकु, एप्पल टीभी र फायर टीभीजस्ता स्ट्रिमिङ मिडिया प्लेयरमा पनि उपलब्ध हुने बताइएको छ ।

स्ट्रिमिङ सेवा नासाको नयाँ बेटा वेबसाइटमार्फत पनि उपलब्ध हुने जनाइएको छ ।

यो वेबसाइटमा नासाका मिसन, अनुसन्धान, जलवायुसम्बन्धी विवरण र आर्टेमिस मिसनका अपडेट उपलब्ध हुने बताइएको छ ।