काठमाडौं । काठमाडौं महानगरपालिकाले ४० माइक्रोनभन्दा कम मोटाइका पोलिथिन सामग्री बिक्री वितरण र प्रयोगमा प्रतिबन्ध लगाएको छ ।
जसअन्तर्गत पोलिथिन झोला, नक्कली फूल र सजावटका सामग्री पनि महानगरपालिकाभित्र ल्याउन, भण्डारण गर्न र बिक्री गर्न प्रतिबन्ध लगाइएको छ ।
महानगरको नगरसभाले आर्थिक वर्ष २०८०/०८१ को पहिलो महिना साउन १ गतेबाट प्लाष्टिकका झोला, प्लाष्टिकजन्य फूल तथा सजावटका सामान निषेध गर्ने नीति पारित गरेको हो ।
४० माइक्रोनभन्दा कम मोटाइका प्लाष्टिकजन्य सामग्रीको प्रयोगबारे नगर प्रहरीले अनुगमन गर्नेछ । अनुगमनका क्रममा माइक्रोमिटरबाट मोटाइ नापी सोभन्दा कम मोटाइको पाइए जफत गरिनेछ ।
नगर प्रमुख बालेन्द्र शाह (बालेन)ले प्लाष्टिक निषेध कार्यक्रम महानगरका लागिभन्दा पनि महानगरबासी, वातावरण, जीव जनावरको वचावटका लागि गरिएको भन्दै किनमेल गर्न जाँदा कपडाको झोला प्रयोग गर्न सबैमा अनुरोध गरेका छन् ।
यस्तो छ नगर प्रमुख बालेनकोे अपिल
प्लाष्टिक निषेध कार्यक्रम महानगरका लागिभन्दा पनि महानगरबासी, वातावरण, जीव जनावरको वचावटका लागि हो । प्लाष्टिकले हामीलाई कति हानी गरिरहेको छ भन्ने कुरा आममानसमा महसुस हुन सकेको छैन । तर, अध्ययनअनुसार नवजात शिशुको सालनालमा माइक्रो प्लाष्टिक (प्लाष्टिकको कण जसलाई खुला आँखाले देख्न सकिँदैन) पाइएको छ । यस्तै जनावरको दिशामा पनि प्लाष्टिक पाइएको छ । यो तथ्य ग्लोबल इकोलोजी एण्ड कन्जर्भेसन जर्नलमा प्रकाशित छ ।
प्लाष्टिक उत्पादन गर्न रसायनको पनि प्रयोग गरिन्छ । त्यसैले यसलाई बाल्दा डाइअक्सिन, फ्युरान जस्ता विषाक्त ग्याँसहरू उत्सर्जन हुन्छन् । जुन ग्याँसका कारण मानिसमा फोक्सो, मुटु र छालासम्बन्धी रोगहरू लाग्ने खतरा हुन्छ । फालिने प्लाष्टिकले ढल निकास बन्द हुन्छ । माटोको प्राकृतिक गुण परिवर्तन गरिदिने, जथाभावी उडेर तथा छरिएको अवस्थामा रहेर सहरी सुन्दरतामा ह्रास ल्याउँछ । सहरको सभ्यताका बिम्ब वाग्मती, विष्णुमती, मनोहरा, धोवीखोला, टुकुचा लगायतका नदी, राजकुलाहरू र खुल्ला स्थानहरूमा प्लाष्टिक फ्यालिएका कारण प्रदुषित बनेका छन् । सामुदायिक चौपायाले खानेकुरासँगै प्लाष्टिक खाँदा पशु स्वास्थ्यमा पनि गम्भीर आघात परेको छ ।
माइक्रो प्लाष्टिकले मानव कोषमा पार्ने असर सबैभन्दा घातक छ । यसैकारण दीर्घ रोग र महामारीबाट जनधनको क्षति व्यहोर्नु परिरहेको छ । मानिसमा जस्तै असर अन्य जीव जनावरमा पनि परेको छ । जमिनको उर्वराशक्ति क्षय भइरहेको छ । मानव सभ्यता र वातावरण माथिको यो असर घटाउन काठमाडौं महानगरपालिकाले पोलिथिन झोला र प्लाष्टिकजन्य फूललगायतका सामान निषेध अभियान थालनी गरेको हो ।
अहिलेसम्म बिग्रिएको अवस्थामा सुधार ल्याउन र बचेको अवस्थालाई संरक्षण गर्न मानव आचरण र व्यवसायिक क्रियाकलापमा सुधार गर्नुपर्छ । नागरिकको स्वच्छ वातावरणमा स्वस्थ्य भएर बाँच्न पाउने संरक्षण गर्न काठमाडौं महानगरपालिकाले ४० माइक्रोनभन्दा कम मोटाइका पोलिथिन झोला, नक्कली फूल र सवावटका वस्तु तथा सामग्री महानगरपालिकाभित्र ल्याउन, भण्डारण गर्न र बिक्री गर्न प्रतिबन्ध लगाएको छ ।
यसको कार्यान्वयनका लागि हामीले वातावरण व्यवस्थापन विभाग र नगर प्रहरी बलको संयुक्त अनुगमन टोली परिचालन गर्दैछौँ । प्रहरीको क्षेत्रबाट चार टोली र केन्द्रबाट एउटा टोली गरी पाँचवटा टोली यसका लागि खटाइनेछ । टोलीले माइक्रोमिटरबाट प्रयोगमा रहेका प्लाष्टिकको जाँच गर्छ । यदि यी पोलिथिन ४० माइक्रोनभन्दा कम मोटाइका भए जफत गर्छ । प्लाष्टिकका फूल, प्लाष्टिकका सजावटका सामानचाहीँ कुनै पनि प्रयोग गर्न पाइँदैन । यसर्थ, अनुगमनमा आउनु र जफत गर्नुअघि आयात, भण्डारण र बिक्री गर्ने व्यक्ति तथा व्यापारिक संघ संस्थाले निषेधित कार्य नगर्न नगराउन अनुरोध गर्दछु ।
प्लाष्टिक प्रयोग र असरका केही तथ्य हेरौँ
– सहरमा उत्पादन हुने फोहोरमध्ये ७५.५ प्रतिशत जैविक र २४.५ प्रतिशत नकुहिने फोहोर छ । नकुहिने फोहोरको सबैभन्दा धेरै प्लाष्टिक (६.५ प्रतिशत) छ । यसको पनि ३.८ प्रतिशत पोलिथिन झोला छ । नकुहिने अन्य फोहोरमा धातु, सिसा, रबर, कपडाजन्य, विद्युतीय र अन्य खालको फोहोर छ ।
– नदीलाई प्रदुषण गराउन प्लाष्टिकको ७० प्रतिशत भूमिका छ ।
– काठमाडौं उपत्यकामा दैनिक करिब ५० लाख थान प्लाष्टिक झोलाको प्रयोग हुने अनुमान छ ।
प्लाष्टिक निषेध गर्न यस अघि गरिएका प्रयास र नतिजाका विषयमा यहाँलाई जानकारी हुनुपर्छ । त्यसको स्मरण यसरी गर्न सकिन्छ –
– प्लाष्टिकजन्य वस्तुको उत्पादन तथा उपयोगका कारण वातावरण र जनस्वास्थ्यमा प्रतिकुलता भइ व्यक्तिको स्वस्थ्य रूपमा बाँच्न पाउने अधिकार कुण्ठित भएको जिकिर गर्दै सर्वोच्च अदालतमा मुद्दा दायर
– परीक्षणसिद्ध तथ्य र वैज्ञानिक निष्कर्षसहित निर्णय हुनुपर्ने जनाउँदै विज्ञ टोली गठन गरी प्रतिवेदन दिन २०६१ साल मंसिर ८ गते निर्देशात्मक आदेश
– गठित समितिले प्रतिवेदन बुझाउन सकेन । यो काम २०७० साल साउन २४ गते वातावरण मन्त्रालयका महाशाखा प्रमुखको संयोजकत्वमा पुनर्गठित समितिबाट सम्पन्न
– पुनर्गठित समितिमा उपत्यकामा रहेका नगरपालिका (तत्कालीन पाँचवटा) का वातावरण हेर्ने प्रतिनिधि, त्रिभुवन विश्वविद्यालय रसायनशास्त्र अध्ययन विभागका प्रतिनिधि, नेपाल विज्ञान तथा प्रविधि प्रज्ञा प्रतिष्ठान (नाष्ट) मा आवद्ध वातावरणविद्, प्लाष्टिक उत्पादन संघका प्रतिनिधि, वातावरण मन्त्रालय वातावरण विभागका प्रतिनिधि, मन्त्रालयकै कानुन तथा फैसला कार्यान्वयन शाखा र मापदण्ड शाखाका एक/÷एकजना प्रतिनिधि गरी जम्मा १२ जना सदस्य
– प्लाष्टिकका झोलाको प्रयोगबाट जनस्वास्थ्य र वातावरणमा प्रत्यक्ष नकारात्मक असर वैज्ञानिक तथा प्रमाणसिद्ध तथ्य रहेको प्रतिवेदनमा उल्लेख
– प्रतिवेदनमा प्लाष्टिक झोलाको प्रयोग निषेध गर्नुपर्ने कारणमा– प्लाष्टिकमा रहेका रसायनिक तत्वहरूले पर्यावरण, भौतिक पूर्वाधार, प्राकृतिक सुन्दरता र मानव स्वास्थ्यमा नकारात्मक असर पु¥याएको मुख्य कारण
– २०६८ सालमा काठमाडौं महानगरपालिकाले जारी गरेको ‘काठमाडौं घोषणा’बाट काठमाडौं सहरभित्र चरणबद्ध रूपमा प्लाष्टिक झोला नियमन गर्ने लक्ष्य
– २०७१ भदौ ९ गते व्यवस्थापिका संसद्, वातावरण संरक्षण समितिको बैठकले २०७२ वैशाख १ गतेबाट उपत्यकालाई प्लाष्टिक झोला मुक्त क्षेत्र बनाउन प्रधानमन्त्री तथा मन्त्री परिषद्को कार्यालयलाई निर्देशन
– प्रधानमन्त्री तथा मन्त्री परिषद्को कार्यालयले फोहोरमैला व्यवस्थापन ऐन कार्यान्वयन कार्य प्रगति विवरणका सम्बन्धमा प्रतिवेदन प्रस्तुत गर्न साविक संघीय मामिला तथा स्थानीय विकास मन्त्रालय (हाल संघीय मामिला तथा सामान्य प्रशासन मन्त्रालय)लाई र सहरी विकास मन्त्रालयलाई निर्देशन
– प्लाष्टिक झोला उत्पादन गर्ने कारखानालाई कपडा झोला उत्पादन गर्ने कारखानामा परिणत गराउन अध्ययन गरी त्यसको जानकारी समितिमा पेस गर्न उद्योग मन्त्रालयलाई निर्देशन
– २०७२ वैशाख १ गतेबाट सुरु भएको अभियान महाभूकम्पका कारण स्थगित
– काठमाडौं महानगरपालिकाको नगरसभाबाट आर्थिक वर्ष २०८०/०८१ को पहिलो महिना साउन १ गतेबाट प्लाष्टिकका झोला, प्लाष्टिकजन्य फूल तथा सजावटका सामान निषेध गर्ने नीति पारित
मानिस बाँच्ने धर्ती बचाएर धर्तीका प्राणी जगतलाई बचाउने यस अभियानमा हामीलाई नागरिक सहभागिता, उपभोक्ता, विक्रेतासँगै क्षेत्रगत सबैबाट सहयोग चाहिएको छ । सर्वसाधारण नागरिकले बजार जाँदा कागज वा कपडाको झोला बोकेर जान थाल्नुभयो भने ठूलो सहयोग थालनी हुनेछ । धन्यवाद
