जनकपुरधाम । धनुषा–सिरहा जोड्ने कमला पुल निर्माणमा ढिलाइ भएपछि सिरहा नगरपालिकाले बाँसको पुल बनाएको छ । सर्वसाधारणलाई आवागमनमा समस्या भएपछि बाँसको टेका लगाएर अस्थायी प्रकृतिको पुल बनाइएको हो ।

यसअघि सर्वसाधाण दुईघण्टा यात्रा गरेर सीमावर्ती भारतीय बजार जयनगर हुँदै आवागमन गर्ने गरेका थिए । कतिपय डुङ्गाबाट आवतजावत गर्थे ।

बाँसको पुलमा मोटरसाइकल र पैदलयात्री आवतजावत गर्न सक्ने छन् । 

तर, स्थानीय बाढीले पुल बगाउनेमा सशंकित छन् । स्थानीय मोहनकुमार दासले बाँसको अस्थायी पुलले राहत भएपनि बाढीले बगाउन सक्ने चिन्ता रहेको बताए । 

"लामो समयदेखि निर्माणाधीन पक्की पुल नबन्दा यहाँको जनताले सास्ती खेप्नुपरेको थियो । यसले राहत भएको छ । कामचलाउ पुल त बन्यो तर कहिलेसम्मलाई हो भन्न सकिँदैन," उनले भने ।

पुलले कृषि उपजलाई बजारसम्म लैजान किसानलाई पनि सहज भएको उनको भनाइ छ । "खेतीपाती गर्नका लागि नदीबाट जोखिमपूर्ण यात्रा गर्न बाध्य थियौँ । अस्थायी पुल भए पनि हामीलाई सहज भएको छ," उनले भने ।

कमला नदीमा २०६८ सालमा पुल निर्माण सुरु भएको थियो । पप्पु कन्स्ट्रक्सनले ४२ महिनाभित्रै सक्ने गरी २४ करोड ९१ लाख रुपैयामा ठेक्का पाएको थियो । उसले सात वर्षमा पनि पुल निर्माण पूरा नगरेपछि हुलाकी राजमार्ग सडक निर्देशनालयले पप्पुसँगको ठेक्का रद्द गरेको थियो । 

त्यसपछि १३ असार २०७८ मा ४७० मिटर लामो पुल निर्माण सक्ने गरी लुम्बिनी बिल्डर्सलाई ठेक्का दिइएको थियो । उक्त पुलको निर्माण अन्तिम चरणमा पुगेको थियो । २०७८ साउनमा उद्घाटनकै तयारी गरिएको थियो ।

तर, निर्माण कम्पनीले सरकारलाई हस्तान्तरण गर्नुअघि नै २०७८ असार १७ गते बाढीमा पुल भासिएको थियो । पुल भासिएको पनि दुई वर्ष भइसकेको छ । तर, निर्माण पूरा हुन अझै समय लाग्ने भएको छ । वर्षाको कारण नदीमा पानी भएपछि निर्माण कम्पनीले काम सुरु गरेको छैन ।