काठमाडौं । नेपाली चलचित्र 'दि रेड सुटकेस' भेनिस फिल्म फेस्टिभलमा छनोट भएको छ । फिडेल देवकोटाको लेखन तथा निर्देशन रहेको चलचित्र भेनिस फिल्म फेस्टिभलमा छनोट भएको हो ।

भेनिसको दोस्रो मुख्य प्रतिस्पर्धा होराइजन विधामा छनोट भएको हो । वैदेशिक रोजगारीले नेपाली समाजमा पारेको प्रभाव यो सिनेमाको मुख्य कथा हो । फिडेलको यो डेब्यू फिल्म हो । 

रामकृष्ण पोखरल निर्माता रहेको चलचित्रमा विपीन कार्की, सौगात मल्ल, प्रवीन खतिवडा, सृष्टि श्रेष्ठकाे अभिनय रहेकाे छ ।

विदेशी निर्माता र छायांकारबिना विश्वको प्रतिष्ठित फेस्टिभलमा छनोट हुने ‘दि रेड सुटकेस’ पहिलो नेपाली चलचित्र हो । यसअघि भेनिस पुगेका ‘कालो पोथी’ र ‘सेतो सूर्य’ दुवैमा निर्माता तथा छायांकार विदेशी थिए । 

विपीनले यो चलचित्रमा आफूले बिना पारिश्रमिक काम गरेको बाह्रखरीसँग बताएका थिए । अन्तर्राष्ट्रिय फिल्म फेस्टिभलका लागि नयाँ मेकरले बनाएको र अन्तर्राष्ट्रिय बजारमा नेपाली सिनेमाको बजार विस्तारमा सहयोग हुने अपेक्षासहित बिना पारिश्रमिक काम गरेको उनले बताएका थिए । 

यद्यपि, आफूले उक्त सिनेमाबारे धेरै नबुझेको उनको भनाइ थियो । चलचित्र निकै स्लो पेसमा रहेको उनले बताएका छन् ।