काठमाडौं । पार्टी सभापति शेरबहादुर देउवाले समय नदिएपछि नेपाली कांग्रेस रुपान्तरण अभियानले आफ्नो प्रतिवेदन पार्टी पदाधिकारीलाई बुझाउने तयारी गरेको छ । अभियानले सातै प्रदेश र डायसपोरा पुगेर पार्टी रूपान्तरणका लागि नेता कार्यकर्तासँग छलफल गरी तयार गरेको प्रतिवेदन बुझ्न सभापति देउवाले अस्वीकार गरेका छन् ।
अभियन्ता तथा कांग्रेस नेता रञ्जित कर्णले एक हप्तादेखि समय माग गरे पनि पार्टी सभापतिले समय नदिएको बताए ।
“हप्तादिनदेखि मागेको सभापतिबाट समय पाएनौं । आज केन्द्रीय समिति बैठक अघि सके सभापति नभए उपसभापति महामन्त्रीसहित अन्य पदाधिकारीलाई प्रतिवेदन बुझाउँछौं,” कर्णले भने ।
रूपान्तरण अभियानले पार्टी जनमाझ अलोकप्रिय हुँदै गएको, संगठन सुस्त भएको, पार्टीको कार्यशैली प्रभावकारी नभएको, युवामाझ आकर्षण घटेकोलगायत विभिन्न विषयमा नेता कार्यकर्ताबाट सुझाव संकलन गरेको थियो ।
