काठमाडौं । नेपाली कांग्रेसको केन्द्रीय समिति बैठकको प्रत्यक्ष प्रसारणका लागि आवश्यक तयारी गरिँदै छ । पार्टीका प्रचार विभाग प्रमुख तथा केन्द्रीय सदस्य मीन विश्वकर्माले प्रत्यक्ष प्रसारणको तयारी भइरहेको जानकारी दिए ।
आज दिउँसो १ बजेदेखि पार्टी मुख्यालय सानेपामा कांग्रेसको केन्द्रीय समिति बैठक बस्दै छ ।
सभापति शेरबहादुर देउवाको निर्देशनमा बैठकको प्रत्यक्ष प्रसारणको तयारी गरिएको विश्वकर्माले बताए ।
“अहिले हामीसँग उपलब्ध क्यामेरा प्रयोग गरेर हाम्रो आधिकारिक फेसबुक पेजबाट बैठक लाइभ गर्ने तयारी भएको हो । प्राविधिक साथीहरूले काम गरिरहनुभएको छ,” उनले बाह्रखरीसित भने, “बैठक सुरु भएपछि सधैँझै मिडियाका साथीहरूलाई फोटो भिडियो खिच्न दिइन्छ । त्यसपश्चात् सबै लाइभ हुन्छ । बेलाबेला मिडिया सेन्टरबाट हामी ब्रिफिङ पनि गर्छौँ ।”
सोमबार बसेको कांग्रेस पदाधिकारी र पूर्वपदाधिकारीको बैठकमा सभापति देउवाले बैठक लाइभ गर्ने प्रस्ताव गरेका थिए । बैठकमा बोलेका सबै कुरा मिडियामा छताछुल्ल भएको र यसले गलत सन्देश गएको भन्दै उनले लाइभ गर्ने प्रस्ताव गरेको देउवानिकट सहमहामन्त्री महेन्द्र यादव बताउँछन् ।
उनका अनुसार सभापति देउवाले आज एक दिन लाइभ गर्ने र प्रभावकारी भए निरन्तरता दिने र नभए लाइभ नगर्ने प्रस्ताव गरेका छन् ।
