काठमाडौं। नेपाल समाजवादी पार्टी (नेसपा)ले आजबाट संगठन निर्माण तथा विस्तार अभियान सञ्चालन गरेको छ ।
'अबको राष्ट्रको संकल्प, समाजवादी विकल्प' भन्ने नारासहित पुससम्म चल्ने अभियानको नेसपाका केन्द्रीय पदाधिकारीहरूले सातै प्रदेशमा वृक्षरोपण गरी उद्घाटन गर्ने कार्यक्रम रहेको छ ।
अभियानको कोसी प्रदेशमा उपाध्यक्ष हिसिला यमी, मधेस प्रदेशमा अध्यक्ष महिन्द्र राय यादव, वाग्मतीमा सहअध्यक्ष गंगानारायण श्रेष्ठ, गण्डकीमा अध्यक्ष डा. बाबुराम भट्टराई, लुम्बिनीमा सहअध्यक्ष गोविन्द चौधरी, कर्णालीमा भक्तबहादुर शाह र सुदूरपश्चिममा उपाध्यक्ष दुर्गा सोबको नेतृत्वमा अभियान सञ्चालन हुनेछ ।
पार्टी अध्यक्ष डा. भट्टराईले गोरखाको पालुङटार नगरपालिका–१ खोप्लाङ ज्योती चौतारामा विभिन्न प्रजातिका वृक्षरोपण गरेर अभियानको सुरुवात गर्नेछन् ।
त्यस्तै कोसी प्रदेशमा आत्मनिर्भर अर्थतन्त्रको नारासहित मोरङ र सुनसरी जिल्लामा २०० थान फलफूलको वृक्षरोपण गरेर अभियानको शुभारम्भ हुने प्रदेश इन्चार्ज भरत दाहालले जानकारी दिए । मधेस प्रदेशमा फूलको विरुवा रोपेर अभियान सन्चालन गर्ने नेसपा नेता प्रमोद यादवले जानकारी दिए ।
वागमती प्रदेशका १३ जिल्लामा प्रत्येक जिल्लामा एकहजार फलफूलसहित बिभिन्न प्रजातीका बोटबिरुवा रोपेर अभियानको शुभारम्भ हुने प्रदेश अध्यक्ष बन्दना सुवेदीले जानकारी दिइन् । त्यसैगरी सुदूरपश्चिम प्रदेशका कैलाली जिल्लाको टिकापुर, भजनी र कैलालीमा व्यापकरूपमा वृक्षरोपण गरेर अभियानको शुभारम्भ हुने इन्चार्ज जनक शाहले जानकारी दिए । प्रदेशका कन्चनपुर, बैतडी, डडेलधुरा, अछाम, बाजुरा, बझाङका विभिन्न स्थानमा समेत वृक्षरोपण गरी अभियानको शुभारम्भ हुने शाहले जानकारी दिए ।
प्रत्येक जिल्लामा विभिन्न प्रजातिका एक हजार भन्दा बढी वृक्षरोपण गरिने लक्ष्य लिइएको नेसपाले जनाएको छ । अभियान सातै प्रदेशका सबै जिल्ला तथा केही आवश्यकताअनुसार पालिका तहमा समेत सञ्चालन गरिने कार्यक्रम रहेको नेसपाले जनाएको छ ।
