काठमाडौं । समाजवादी मोर्चाका अध्यक्ष चार/चार महिनामा फेरिने भएका छन् ।

शनिबार प्रधानमन्त्रीको सरकारी निवास बालुवाटारमा बसेको समाजवादी मोर्चाको बैठकबाट मोर्चाको कार्यविधि र आचारसंहिता तय गर्दै यस्तो निर्णय गरिएको नेकपा (एकीकृत समाजवादी)का उपाध्यक्ष राजेन्द्र पाण्डेले जानकारी दिए । यसअघिको बैठकबाट ६ महिनामा नेतृत्व फेरिने निर्णय गरिएको थियो ।

मोर्चामा हरेक दलबाट चार/चार नेता रहने निर्णय पनि गरिएको छ । “चार/चार महिनामा मोर्चाको अध्यक्ष फेरिने र एउटा पार्टीबाट चारजना नेताले भाग लिन पाउने निर्णय गरिएको छ,” पाण्डेले भने ।

उनका अनुसार मोर्चामा नेकपा (माओवादी केन्द्र)का तर्फबाट प्रधानमन्त्री समेत रहेका अध्यक्ष पुष्पकमल दाहाल ‘प्रचण्ड’, वरिष्ठ उपाध्यक्ष नारायणकाजी श्रेष्ठ, उपाध्यक्ष कृष्णबहादुर महरा र महासचिव देव गुरुङ रहनेछन् ।

एकीकृत समाजवादीका तर्फबाट अध्यक्ष माधवकुमार नेपाल, उपाध्यक्षहरू राजेन्द्र पाण्डे र प्रवेश हमाल र महासचिव घनश्याम भुसाल रहने उनले बताए ।

जनता समाजवादी पार्टी (जसपा)का तर्फबाट अध्यक्ष उपेन्द्र यादव, नेताहरू राजेन्द्र श्रेष्ठ, रकम चेम्जोङ र गोविन्द चौधरी रहने निर्णय गरिएको पाण्डेले जानकारी दिए ।

मोर्चामा नेपाल कम्युनिस्ट पार्टी (नेकपा)का तर्फबाट महासचिव नेत्रविक्रम चन्द ‘विप्लव’ र प्रवक्ता खड्गबहादुर विश्वकर्मा ‘प्रकाण्ड’ रहने भएका छन् ।

प्रदेश र जिल्लासम्म मोर्चाको संगठन बनाउन सकिने समेत निर्णय गरिएको छ ।

कार्यविधि बनाउन यसअघि बनाइएको चार सदस्यीय कार्यदलका नेताहरूलाई सचिवालय सदस्य बनाइएको उनले बताए । देव गुरुङ, प्रवेश हमाल, राजेन्द्र श्रेष्ठ र खड्गबहादुर विश्वकर्मालाई सचिवालय सदस्य बनाइएको हो ।

उनका अनुसार आउँदो साउन १२ गतेदेखि सातै प्रदेशमा ‘सन्देश सभा’ गर्ने निर्णय गरिएको छ । प्रदेशगत रूपमा मिति भने तय हुन बाँकी छ ।

वाग्मती प्रदेश र सुदूरपश्चिम प्रदेशको सभाको व्यवस्थापन एकीकृत समाजवादीले गर्ने निर्णय गरिएको छ । लुम्बिनी प्रदेशको सभाको व्यवस्थापन गर्ने जिम्मेवारी विप्लव नेतृत्वको नेकपाले पाएको छ ।

कर्णाली प्रदेश र गण्डकी प्रदेशको सभाको व्यवस्थापन माओवादी केन्द्र र कोसी प्रदेश र मधेस प्रदेशको सभाको व्यवस्थापन जसपाले गर्ने निर्णय गरिएको उनले जानकारी दिए ।