काठमाडौं । मेटाले बुधबार सार्वजनिक गरेको एप थ्रेड्सविरुद्ध ट्विटरले कानुनी कारबाही खोज्ने भएको छ । ट्विटरसँग मिल्दोजुल्दो एपलाई मेटाका प्रमुख मार्क जुकरबर्गले त्यसको प्रतिस्पर्धी भनेका छन् ।

तीन करोड बढी प्रयोगकर्ताले चलाउन थालिसकेको थ्रेड्सका विषयमा ट्विटरका प्रमुख एलन मस्कले चोरी गर्नु ठिक नभएको बताएका छन् । सामाजिक सञ्जाल ट्विटरमा उनले भनेका छन्, “प्रतिस्पर्धा ठिक हो, तर चोरी ठिक होइन ।”

• सात घण्टामा एक करोड नाघे थ्रेड्सका प्रयोगकर्ता

मेटाले ट्विटरका दर्जनौँ पूर्वकर्मचारी राखेर त्यस्तै एप बनाएपछि मुद्दा हाल्ने तयारी गरिएको हो । ट्विटरका वकिल एलेक्स स्पिरोले मेटाका सीईओ जुकरबर्गलाई बुधबार एक पत्र पठाउँदै यस्तो चेतावनी दिएका हुन् ।

ट्विटरको आन्तरिक प्रणालीमा पहुँच भएका कर्मचारी राखेर मेटाले ‘कपिक्याट’ एप थ्रेड्स बनाएको पत्रमा उल्लेख छ ।

मेटाले भने ट्विटरका पूर्वकर्मचारीले थ्रेड्स एप बनाउन मद्दत गरेको आरोप अस्वीकार गरेको छ । गएको अक्टोबरमा मस्कले खरिद गरेपछि करिब ८० प्रतिशत कर्मचारी कटौती हुनुअघि ट्विटरमा सात हजार ५०० जनशक्ति थियो । बीबीसीबाट ।