काठमाडौं । घोराही सिमेन्टको सार्वजनिक निष्कासन(आइपीओ)मा छलीमा एनआईसी एशिया बैंकसमेत मुछिएको छ ।  धितोपत्र बोर्डको छानबिनको क्रममा एनआईसी एशिया बैंकको मिलोमतोमा सर्वसाधारणलाई भ्रम पार्न खोजेको देखिएको छ । 

आस्वा सदस्य एनआईसी एशिया बैंकले आवेदकको खातामा पैसा पर्याप्त नभए पनि आवेदक स्वीकृत गरेको बोर्डको छानबिनमा देखिएको छ । “खातामा पैसा नभए पनि एनआईसी एशिया बैंकले आवेदन स्वीकृत गरेको विषय छानबिन गर्नुपर्ने देखिएको छ,” बोर्डले आफ्नो प्रतिवेदनमा भनेको छ । 

घोराही सिमेन्टको मुख्य लगानीकर्ता त्रिवेणी ग्रुप र विशाल ग्रुप हो । एनआईसी एशिया बैंक पनि मुख्य लगानीकर्तामा विशाल ग्रुप र त्रिवेणी ग्रुप नै रहेको छ । यसले घोराही सिमेन्टको आइपीओ महंगो मूल्यमा बेच्नको लागि संगठित रुपमा प्रवर्धकले ठगी गर्न खोजेको आशंका दिएको छ । घोराहीको रेटिङ विशाल ग्रुप नै प्रवर्धक रहेको केयर नेपालबाट भएको थियो । विशाल ग्रुपले नियम विपरीत आफ्नो लगानी रहेको केयर नेपालबाट रेटिङ गराउने काम गरेको छ । 

बोर्डको खातामा पैसा नभए पनि ठूलो रकमको कित्ता परेका व्यक्तिलाई जालसाजीमा प्रहरीले अनुसन्धान गरेर मुद्दा चलाउन सक्ने सुझाव दिएको छ । 

घोराही सिमेन्टको आइपीओ आरक्षण हुने स्थानीय,कर्मचारी,सामूहिक लगानी कोष र वैदेशिक रोजगारीमा रहेकाहरुले किनेका थिएनन् । घोराहीले १०० रुपैयाँमा ३३५ रुपैयाँ प्रिमियम मूल्य थपेर ४३५ रुपैयाँमा आइपीओ निष्कासन गरेको थियो ।