काठमाडौं । वर्षाका कारण देशका विभिन्न ठाउँमा सडक अवरुद्ध हुने, बाढी पहिरो जाने समस्या देखिरहेको छ । असारको सुरुमै पूर्वी नेपालमा पहिरोका कारण ठूलो जनधनको क्षति भएको थियो ।

सडक विभागका अनुसार बाढी र पहिरोका कारण मात्र यो वर्ष अहिलेसम्म करिब २५ करोड रुपैयाँ बराबरको क्षति भइसकेको छ । विभागका अनुसार एक दर्जनभन्दा बढी वटा सडक एकतर्फी रूपमा अवरुद्ध भएका छन् ।

पूर्वसावधानी नअपनाए अझै ठूलो क्षति हुने जोखिम छ । मौसम पूर्वानुमान महाशाखाले वर्षाका कारण मेघ–गर्जन/चट्याङ, गेग्रान बहाव, बाढी, पहिरो तथा भू–क्षयका कारण हुन सक्ने जोखिम वा क्षतिबाट बच्न आवश्यक सतर्कता अपनाउन आग्रह गर्दै आएको छ ।

महाशाखाका वरिष्ठ मौसमविद् राजु प्रधानाङ्गका अनुसार जुलाई र अगस्ट बढी मनसुन सक्रिय हुने महिना हुन् । अझ धेरै वर्षा हुने महिना सुरु भएकाले बाढी पहिरो जोखिम थप बढ्ने उनको भनाइ छ । 

"जुलाई र अगस्टमा बढी वर्षा हुन्छ । अब बल्ल बढी वर्षा सुरु हुने बेला भयो । सबैतिर सतर्कता अपनाउन आवश्यक छ," उनले भने ।

प्रधानाङ्गका अनुसार काठमाडौं उपत्यकामा आगामी तीन दिन मौसम बदली नै रहेर सामान्यदेखि मध्यम वर्षाको सम्भावना रहेको छ । 

उसो त देशभर नै हाल सामान्यदेखि पूर्ण बदली रहेको छ । काठमाडौं उपत्यकासिहत कोसी, मधेस र लुम्बिनी प्रदेशका थोरै र बाँकी प्रदेशका एक–दुई स्थानमा हल्कादेखि मध्यम वर्षा भइरहेको छ ।

आज राति पनि देशभर आंशिकदेखि सामान्य बदली रहनेछ । देशका केही स्थानमा हल्कादेखि मध्यम वर्षाको सम्भावना रहेको महाशाखाले जनाएको छ । लुम्बिनी र सुदूरपश्चिम प्रदेशको एक–दुई स्थानमा मेघ–गर्जन/चट्याङसहित भारी वर्षाको समेत सम्भावना रहेको छ ।

भोलि (बिहीबार) भने देशभर सामान्यदेखि पूर्ण बदली रहने महाशाखाको अनुमान छ । भोलि देशका केही स्थानमा हल्कादेखि मध्यम वर्षाको सम्भावना छ। साथै कोसी र सुदूरपश्चिम प्रदेशको एक–दुई स्थानमा मेघगर्जन/चट्याङसहित भारी वर्षाको  सम्भावना छ । कोसी र मधेस प्रदेशका तराईका थोरै स्थानमा हावा हुरीको समेत सम्भावना रहेको महाशाखाको अनुमान छ । 

भोलि राति पनि देशभर आंशिकदेखि सामान्य बदली रहने छ । कोसी, वाग्मती, गण्डकी र लुम्बिनी प्रदेशका केही तथा बाँकी प्रदेशका थोरै स्थानमा हल्कादेखि मध्यम वर्षाको सम्भावना रहेको छ । कोसी, लुम्बिनी र सुदूरपश्चिम प्रदेशको एक–दुई स्थानमा मेघ–गर्जन/चट्याङसहित भारी वर्षाको समेत सम्भावना रहेको छ । देशको तराई भू–भागका केही स्थानमा भने हावा हुरीको समेत सम्भावना रहेको छ ।

पर्सि (शुक्रबार) दिउँसो पनि देशभर आंशिकदेखि सामान्य बदली रहने छ । कोसी, वाग्मती, गण्डकी र कर्णाली प्रदेशका केही तथा बाँकी प्रदेशका थोरै स्थानमा हल्कादेखि मध्यम वर्षाको सम्भावना रहेको महाशाखाले जनाएको छ । कोसी, वाग्मती, गण्डकी, तथा कर्णाली प्रदेशका एक–दुई स्थानमा मेघ–गर्जन/चट्याङसहित भारी वर्षाको समेत सम्भावना रहेको छ । देशको तराई भू–भागका केही स्थानमा हावा हुरीको समेत सम्भावना रहेको छ ।

पर्सि राति पनि देशभर आंशिकदेखि सामान्य बदली रहने छ । कोसी, वाग्मती, गण्डकी र कर्णाली प्रदेशका केही तथा बाँकी प्रदेशका थोरै स्थानमा हल्कादेखि मध्यम वर्षाको सम्भावना रहेको छ । कोसी, वाग्मती, गण्डकी, तथा कर्णाली प्रदेशका एक–दुई स्थानमा मेघ–गर्जन/चट्याङसहित भारी वर्षाको सम्भावना रहेको छ । लुम्बिनी र सुदूरपश्चिम प्रदेशको तराई भू–भागका केही स्थानमा हावा हुरीको समेत सम्भावना रहेको महाशाखाले जनाएको छ । 

देशका केही स्थानमा हल्कादेखि मध्यम वर्षाको सम्भावना रहेको छ । देशका केही स्थानमा हल्कादेखि मध्यम वर्षाको सम्भावना रहेको छ । साथै मधेस, लुम्बिनी र सुदूरपश्चिम प्रदेशको एक–दुई स्थानमा मेघ–गर्जन/चट्याङसहित भारी वर्षाको समेत सम्भावना रहेको छ ।