काठमाडौं । राष्ट्रिय स्वतन्त्र पार्टी (रास्वपा)का सांसद डा. स्वर्णिम वाग्लेले चालु आर्थिक वर्ष राजस्व संकलनको सरकारको लक्ष्य आधारहीन देखिएको बताएका छन् । मंगलबार प्रतिनिधिसभाअन्तर्गतको अर्थ समितिको बैठकमा उनले यस्तो बताएका हुन् ।

संशोधित बजेटमा समेत सरकारले ४० दिनको राजस्व संकलन प्रक्षेपण गर्न नसकेको आरोप उनले लगाए । असार १८ गतेसम्म आठ खर्ब ६६ अर्ब रुपैयाँ मात्र राजस्व उठाए पनि सरकारले नौ खर्ब उठाएको भन्दै गलत तथ्यांक दिएको उनले जिकिर गरे ।

एक महिनाअघि मात्र अर्थ मन्त्रालयले बजेटमार्फत ११ खर्ब ८० अर्ब उठाउने घोषणा गरेको भन्दै उनले अब आर्थिक वर्षका बाँकी १२ दिनमा केही चमत्कार नहुने बताए ।

नेपालको औसत राजस्व संकलन तीन अर्ब रहेको भन्दै घटाएको संशोधित अनुमानलाई हेर्दा अब दैनिक २६ अर्ब उठाउनुपर्ने बाध्यता सरकारसामु रहेको उनले उल्लेख गरे ।

“असार १८ गतेसम्म सरकारको राजस्व आठ खर्ब ६६ अर्ब मात्रै उठेको छ । नौ खर्ब उठेको छैन । अर्थ मन्त्रालयले एक महिनाअघि मात्रै बजेटमा १,१८० अर्ब उठाउँछु भन्नुभएको छ । आर्थिक वर्ष सकिन १२ दिन मात्रै बाँकी छ । औसत राजस्व संकलन तीन अर्बजति मात्रै हुन्छ । सरकारले घटाएको संशोधित अनुमानलाई हेर्दा पनि दिनमा २६ अर्ब राजस्व उठाउनुपर्ने हुन्छ,” उनले भने, “सरकारले ४० दिनको पनि प्रक्षेपण गर्न नसकेको हो कि ? कि अर्को १२ दिनमा अर्को चमत्कार हुँदै छ ?”

उनले थपे, “असार १८ गतेसम्म अनुदानमा पनि चार अर्ब ८० करोड मात्रै उठेको छ । सरकारको लक्ष्य थियो ५५ अर्ब र एक महिनाअघि मात्रै ३८ अर्ब आउँछ भन्नुभएको थियो । पाँच अर्ब चानचुनमा १२ दिनमा ३०.५ अर्ब पुग्ने आधार होला । सरकारको राजस्व र वैदेशिक अनुदानमा पनि एक महिनाभित्र नै संशोधित अनुमान र वास्तविताबीचको खाडल विश्वनीयतामा प्रश्न उठाउँछ । अर्को १२ दिनमा के हुँदै छ ? के आधारमा सरकारल लक्ष्य राख्यो ?”