काठमाडौं । राष्ट्रिय प्रजातन्त्र पार्टी, नेपालका अध्यक्ष कमल थापाले राजनीतिक दलहरूले भन्ने गरेको समाजवादको उच्चतम परिभाषा सर्वे भवन्तु सुखिन, सर्वे सन्तु निरामया रहेको बताएका छन् ।

सोमबार काठमाडौंमा पार्टीले गरेको राप्रपा नेपालको हिन्दुराष्ट्र : अवधारणा र औचित्य अन्तरक्रिया कार्यक्रमलाई सम्बोधन गर्दै उनले राजनीतिक दलहरूले अहिले भन्ने गरेको समाजवाद वैदिक कालमा नै व्याख्या गरिसकिएको बताए ।

उनले सर्वे भवन्तु सुखिन, सर्वे सन्तु निरामया भन्दा समाजवादको उच्चतम र उत्कृष्ट परिभाषा अरु हुनै नसक्ने दाबी गरे । उनले सबै सुखी हुन्, सबै समान हुन्, कोही पनि दुःखी र रोगी नहुन् भन्नेकुरा वैदिककालमा नै शास्त्रले व्याख्या गरिसकेकाले अहिलेका राजनीतिक दलहरू र संविधानमा लेखिरहनुको अर्थ नरहेको जिकिर गरे ।

उनले भने, “हाम्रो सनातन संस्कृतिमा प्रजातान्त्रिक मूल्य र मान्यता छ । त्यसको संरक्षणका निमित्त पनि नेपाल हिन्दुराष्ट्र हुनुपर्छ । सामाजिक समन्वय, नैतिक मूल्य, उदार आर्थिक मान्यता, यो उदार आर्थिक मान्यता कतिपयले यो आधुनिक विश्वको उपलब्धिको रूपमा लिएका छन् । प्रजातन्त्र, डेमोक्रेसी र लिबरल इकोनोमीलाई एक अर्काका परिपूरकका रूपमा लिइरहेका छन् ।”

उनले प्रजातान्त्रिक मूल्य र मान्यताको संरक्षणका लागि पनि नेपाल हिन्दुराष्ट्र हुनुपर्ने बताए । उनले हिन्दु राष्ट्रका कुरा गर्दा अहिलेका आधुनिक कुरालाई वहिष्कृत गर्ने नभइ त्यसलाई पनि संरक्षण गरेर आर्थिक समृद्धिको दिशामा जान सकिने बताए ।