काठमाडौं । सोमबार मुस्ताङको लोमन्थाङ गाउँपालिकामा सार्वजनिक बिदा नै दिएर 'राजाका छोरा'को विवाह मनाइँदै छ ।
मुस्ताङका ऐतिहासिक, सांस्कृतिक तथा धार्मिक राजा झिग्मी सिट्टी पलवर विष्टका छोराको बिहे भएको हो ।
राजा विष्टका छोरा राजकुमार झिग्मी धिण्डुप फुन्छोक पलवर विष्टको बिहे ताप्लेजुङबाट भएको हो । लोमन्थाङ गाउँपालिकाका अध्यक्ष टसी न्हर्वु गुरुङले आज दुलहा राजकुमारले ताप्लेजुङबाट दुलही लिएर आएको जन्ती नयाँ दरबार फर्किएको बताएका छन् ।
लोमन्थाङ गाउँपालिकाले दुलहा राजकुमार र दुलहीसहित जन्तीको स्वागतका लागि करिब ३०० घोडा र ६० गाडीको व्यवस्था गरेको छ । गाउँपालिका अध्यक्ष टसी न्हर्वु गुरुङले भने, “जन्ती ताप्लेजुङबाट फर्किसकेको छ । नयाँ दरबार पुग्नुअघि बाटोमा गाउँपालिकाले स्वागतका लागि दुई–तीनसय घोडा र ५०–६० गाडीको व्यवस्था गरेको छ ।”
विवाह उत्सव लोमन्थाङ गाउँपालिका क्षेत्रमा विविध कार्यक्रमका साथ मनाइन्छ । तीन दिनसम्म विवाह उत्सव मनाइने गाउँपालिका अध्यक्ष टसी न्हर्वु गुरुङले बताए ।
विवाहकै अवसरमा सोमबार सबै कार्यालय तथा शिक्षण संस्थाहरूमा बिदा दिइएको थियो । लोमान्थाङमा अझै पनि पलवर विष्टलाई राजाको उपाधि दिएर विभिन्न धार्मिक तथा सांस्कृतिक उत्सवहरूमा सम्मान दिइन्छ ।