काठमाडौं । प्रतिनिधिसभामा विधेयक ढिला प्रस्तुत गरेको भन्दै सरकारले सांसदहरूसँग माफी मागेको छ ।
आइतबारको प्रतिनिधिसभामा राष्ट्रियसभाबाट पास भएर आएको मुलुकी संहितासम्बन्धी केही नेपाल ऐनलाई संशोधन गर्ने विधेयक, २०८० पेस भएको थियो ।
राष्ट्रपति रामचन्द्र पौडेलले वैशाख २० गते अध्यादेश जारी गरेका थिए । केही दिनअघि मात्र राष्ट्रियसभाले पारित गरेर प्रतिनिधिसभामा पठाएको थियो ।
प्रतिनिधिसभाको आइतबार बसेको पहिलो बैठकमा विधेयक टेबल भएको थियो भने आजै बसेको दोस्रो बैठकमा त्यसमाथि सैद्धान्तिक छलफल भएको छ ।
छलफलमा सत्तारूढ दलकै सांसदहरूले विधेयक छापामार शैलीमा आएको, अध्ययन गर्न नपाएको, प्रकृया गलत भएको भन्दै आलोचना गरेका थिए । यस्तै, प्रतिपक्षी दलहरूले भने सरकारले सदनलाई हेपेको, कठपुतली बनाउन खोजेको भन्दै विरोध गरेका थिए ।
सैद्धान्तिक छलफलमा उठेका प्रश्नहरूको जवाफ दिन रोस्टममा उभिएका कानुन, न्याय तथा संसदीय मामिलामन्त्री धनराज गुरूङले विधेयक पेस गर्न ढिला भएको भन्दै माफी मागेका हुन् ।
“जुन ढंगबाट समयमै संसद्मा विधेयक प्रस्तुत हुन नसकेकाले नेपाल सरकारको तर्फबाट माफी माग्नुपर्छ,” रोस्टममा उभिएर उनले भने, “तँ माफी माग भनेर धनराज गुरुङलाई भनिरहनु पर्दैन । किनभने म त्यस्तो अंहकारी हैन । कानुनमन्त्रीको जिम्मेवारी पाएको छु । तर, अहंकार चढेको छैन ।”
उनले विधेयक समयमा ल्याउन नसकेको भन्दै दाहोर्याएर माफी मागे । साथै, असार ६ गते नै पीजन होलमा विधेयक राखिएको भन्दै सांसदहरूले अध्ययन नै नगरी एकोहोरो आरोप मात्र लगाएको गुनासो गरे ।
“नामै पीजन होल, त्यहाँ चाहिँ परेवा बस्छ कि भनेजस्तो लाग्छ । त्यहाँ आएको विषयलाई समयमै अध्ययन गर्ने भए धेरै झञ्झट पोख्नुपर्दैन,” उनले भने ।
