विराटनगर । कोसी प्रदेश सभाको तेस्रो अधिवेशन सुरु भएको छ । अर्थमन्त्रीसमेतको जिम्मेवारीमा रहेका मुख्यमन्त्री हिक्मत कार्कीले सभामा अर्थसम्बन्धी व्यवस्था गर्न बनेको विधेयक र रकम विनियोजन तथा खर्च गर्न सक्ने विधेयक पेस गरेका छन् ।

कोसी सभाको दोस्रो अधिवेशन ६ वटा बैठकपछि स्थगित भएको थियो ।‌

प्रदेश सभालाई सम्बोधन गर्दै मुख्यमन्त्री कार्कीले ९० प्रतिशत मतसहित कोसी नामकरण हुनु उपलब्धि भएको बताएका छन् । उनले सबै प्रदेशमा अस्थिरताको बाछिटा पर्न सुरु भएको पनि बताए ।

"त्यसबेला दलबीच एकता प्रदर्शन भएको थियो । बजेटअघि सत्ता सहभागी दलले हठात् विश्वास मत झिकेपछि अस्थिरता सुरु भयो," उनले भने ।

यसले प्रदेशमा नया अस्थिरताको खेल सुरु भएको उनको भनाइ छ ।

विश्वासको मत लिन सक्ने अवस्था नभएकाले त्यसबेला नीति तथा कार्यक्रम ल्याएको र संविधानअनुसार नै सभा स्थगित गरी अध्यादेशबाट बजेट ल्याएको उनले दाबी गरे । विश्वास मत झिक्दा बजेटका लागि ९ दिनमात्र बाँकी हुँदा धेरै छलफल हुन नसकेको मुख्यमन्त्री कार्कीले जिकिर गरे । 

सभामुख बाबुराम गौतमले बाढीपहिरो पीडितको लागि राहत उपलब्ध गराउन सरकारको ध्यानाकर्षण गराए ।