काठमाडौं । दोस्रो संस्करणको टुसाल विद्यालय स्तरीय पौडी प्रतियोगिता आयोजना हुने भएको छ ।
टुसाल मल्टिभेन्यु प्रालिले मंगलबार पत्रकार सम्मेलनको आयोजना गर्दै प्रतियोगिता असार १५ गते हुने जानकारी दिएको हो । प्रतियोगिता तार्केश्वर–८ स्थित टुसाल मल्टिभेन्युको स्विमिङ पुलमा हुने मल्टिभेन्यूका महाप्रबन्धक प्रविन मान सिंह बस्नेतले बताए ।
प्रतियोगिता २५ मिटरको फ्री स्टाइल विधामा प्रतिस्पर्धा हुनेछ । प्रतियोगितामा जुनियर ब्वाइज, जुनियर गर्ल्स र सिनियर ब्वाइज र सिनियर गर्ल्स गरी चार वटा विधामा प्रतिस्पर्धा गराइनेछ ।
विजयी खेलाडीहरूलाई ट्रफी, मेडल तथा अन्य पुरस्कारले सम्मान गरिने आयोजकले जनाएको छ ।
प्रतियोगितामा १०० खेलाडीको सहभागिता रहने आयोजकले अपेक्षा राखेको छ । हालसम २१ स्कुलले सहभागिताका लागि नाम दर्ता गराएका छन् ।
प्रतियोगिताको प्राविधिक र निर्णायकको जिम्मेवारी विष्णु खड्का लगायत ११ जनाको टिमले जिम्मा लिनेछन् । प्रतियोगितामा मेडिकल सपोर्ट मनमोहन मेमोरियल मेडिकल कलेज तथा शिक्षण अस्पतालको रहनेछ । अस्पतालले प्रतियोगिताको अवधिभर एम्बुलेन्स, एकजना चिकित्सक र दुईजना नर्ससहितको सेवा दिने सम्झौता भएको आयोजकले जनाएको छ।
यस अघि २०७९ जेठ १९ गते मल्टिभेन्यूले पहिलो संस्करणको आयोजना गरेको थियो।