काठमाडौं । रोमानियामा आइतबार राति भएको सांगीतिक कार्यक्रममा गायक प्रकाश सपूतमाथि बोतल प्रहार गर्ने नेपाली व्यक्तिमाथि कानुनी प्रक्रिया सुरु भएको छ ।

कार्यक्रमका आयोजक नरेश गिरीका अनुसार गायक सपूतमाथि बियरको बोतल प्रहार गर्ने व्यक्ति अहिले त्यहाँको अध्यागमनमा छन् । कार्यक्रमस्थलबाटै पक्राउ परेका उनलाई प्रहरीले कानुनी प्रक्रियाका लागि अध्यागमनलाई बुझाएको हो ।

“कार्यक्रमस्थलबाटै उनलाई पक्राउ गरिएको थियो । अहिले उनलाई अध्यागमनमा बुझाइएको छ,” आयोजक नरेश गिरीले बाह्रखरीसँग भने, “अब अध्यागमनले उनलाई अदालतमा बुझाउनेछ । अदालतले कस्तो फैसला गर्छ, त्यहीअनुसार उनले कारबाहीको भागिदार हुनुपर्छ ।”

गएराति ९ बजे रोमानियामा आयोजित ‘याद म्युजिक फेस्टिभल’मा गायक प्रकाशले गीत गाउने क्रममा उनलाई सहभागीमध्येका एकले बियरको बोतल प्रहार गरेका थिए । जसले उनको गालामा लागेको थियो । उनी सकुशल रहेको आयोजकले बताएको छ ।

बोतल प्रहार व्यक्तिको पहिचान खुल्न बाँकी रहेको आयोजक नरेश गिरी बताउँछन् । उक्त फेस्टिभलमा प्रिती आले पनि थिइन् । कार्यक्रममा करिब ४०० नेपाली सहभागी थिए ।

• यसरी प्रहार भयो प्रकाश सपूतमाथि बियरको बोतल