काठमाडौं । प्रधानमन्त्री पुष्पकमल दाहाल प्रचण्डले राष्ट्रहितको रक्षाका लागि सरकार संवेदनशील र प्रयत्नशील रहेको बताएका छन् ।
आजको प्रतिनिधिसभा बैठकमा सांसद अशोककुमार चौधरीले सीमाका सन्दर्भमा सोधेको प्रश्नमा प्रधानमन्त्री भने, “यो विषयमा सरकार गम्भीर रहेको छ । बोर्डरको विषय, नेपालको राष्ट्रिय स्वतन्त्रताको विषय, सार्भभौमिकताको विषय, भौगोलिक अखण्डता र सिमाना सुरक्षाको विषयमा एउटा बृहत्तर राष्ट्रिय एकता भएको कुरा स्पष्ट गर्न चाहन्छु ।”
उनले सीमास्तभको नियमित मर्मत संरक्षण गर्ने विषय सरकारको प्राथमिकतामा रहेको बताए ।
“अन्तर्राष्ट्रिय सीमा सुरक्षालाई थप सबल, सुदृढ र प्रभावकारी बनाउन सीमास्तभहरुको नियमित मर्मत सम्भार गर्दैै जाने र बोर्डर आउट पोस्ट सुदृढीकरण र थप स्थानमा आउटपोस्ट निर्माण गर्दै लैजाने विषय उच्च प्राथमिकतामा रहेको छ,” उनले भने, “सोहीबमोजिम स्रोत, साधन र व्यवस्थापन गरिएको छ ।”
उनले स्थापना भएका २५० बोर्डर आउपोस्टमध्ये १२८ वटाको भौतिक संरचना निर्माण भएको र चालु आर्थिक वर्षमा १० बोर्डर आउटपोस्ट निर्माण सम्पन्न हुने प्रधानमन्त्रीले जानकारी गराए ।
