जनकपुरधाम । सप्तरीको महादेवा गाउँपालिका–३, बथनाहाका विजयकुमार यादवको घरमा पाँच दिनदेखि चुलो बलेको छैन । उनको परिवारले ठूलोबुवा मुनेश्वर यादवको घरमा शरण लिएर बसेको छ । गएको बिहीबार उनीहरूमाथि निर्घात कुटपिट गरिएको थियो । घर समेत भत्काइदिएपछि शरण लिन बाध्य बनेका हुन् ।

मिटरब्याजी वेदनारायण यादवको निर्देशनमा विजयकुमारको परिवारमाथि कुटपिट गरिएको आरोप छ । भाडाका गुन्डा लगाएर आफूहरूमाथि कुटपिट र घर भत्काइदिएको विजयकुमारको भनाइ छ ।

मजदुरी गरी दिन बिताउने विजय अहिले तनावमा छन् । उनको अनुहार मलिन छ । चिन्तित पनि ।

वेदनारायणका विषयमा सोधपुछ गर्न जिल्ला प्रशासन कार्यालय सप्तरीले सोमबार दिउँसो उनलाई बोलाएको थियो । धरानस्थित बीपी कोइराला स्वास्थ्य विज्ञान प्रतिष्ठानमा सपरिवार उपचार गराएर आइतबार अबेर राति मात्र उनीहरू सप्तरी फर्किएका थिए । पैसाको अभावमा पूर्ण उपचार नगराई फर्किएको उनको बिलौना छ ।

उनका अनुसार हात बाँधेर विजयमाथि कुटपिट गरिएको थियो । त्यही बेला प्रतिवाद गर्दा उनकी आमा जागोदेवीमाथि पनि प्रहार गरिएको थियो । जागोदेवीको टाउकोमा भाटाले प्रहार गर्दा गम्भीर चोट लागेको छ । त्यति बेला उनको टाउकोबाट धेरै रगत बगेको विजयले बताए । सोही कारण अहिले जागोदेवी बेलाबेला अचेत हुने गरेको उनको भनाइ छ । वडाध्यक्ष रामकुमार यादवले उपचार खर्चमा विजयलाई सहयोग गरेका छन् ।

आक्रमणकारीले उनको घर भत्काएर त्यहाँको खाद्यान्न, लत्ताकपडा इनारमा फालिदिएका थिए । भत्काएकै ठाउँमा पुनः बस्न मिल्ने बनाउन छानोका लागि टिन र केही खाद्यान्न दिन उनले वडाध्यक्षसँग गुहार गरेका छन् ।

भएको के थियो ?
विजयका अनुसार गएको बिहीबार बिहान ११ बजेतिरको समय थियो । उनी खाना खाएर घरमै सुतिरहेका थिए । उनकी आमा जागोदेवी, पत्नी पुष्पा, भाइबुहारी रञ्जनकुमारी र १२ वर्षीया छोरी लक्ष्मी आँगनमा थिए । त्यही बेला १०÷१२ जनाको समूह उनको घरमा प्रवेश ग¥यो । पुष्पालाई थप्पड हान्दै विजयका बारेमा सोधियो ।

हतियारसहित पुगेका उनीहरूले गाली गर्दै घर भत्काउन थाले । त्यो आवाज सुनेर विजय बाहिर निस्किए । त्यसपछि आफ्नो हात बाँधेर कुटपिट गरिएको उनले बताए । विजय र उनकी आमाको शरीरमा कुटपिटको निलडाम छ । परिवारका अरू सदस्यमाथि सामान्य कुटपिट गरिएको उनको भनाइ छ ।

विजयका अनुसार आक्रमणकारी समूहका केही व्यक्तिले कुटपिट गरेका थिए । केहीले लत्ताकपडा र खाद्यान्न घरबाहिरको इनारमा फालेका थिए । निरन्तर डेढ घण्टा उनीहरूले कुटपिट गरे । विजयको परिवारले चिच्याउँदै ज्यान जोगाउन गुहार गरिरह्यो ।

विजयका ठूलोबुवा मुनेश्वरले आक्रमणकारीसामु हात जोडेर त्यस्तो नगर्न आग्रह गरे । आक्रमणकारीले उल्टै मुनेश्वरलाई विजयले तिर्नुपर्ने पैसाको जिम्मा लिए उनीहरूलाई छाडिदिए बताए । त्यसपछि मुनेश्वरले गाउँलेका घरघरमा गएर उनीहरूलाई जोगाउन आग्रह गरे । केही समयपछि आएका गाउँलेको समूहले आक्रमणकारीमध्येका पाँचजनालाई नियन्त्रणमा लियो । विजयको परिवारलाई उपचारका लागि राजविराज पठाइयो ।

आरोपित हिरासतमा
गाउँलेले पाँच आक्रमणकारीलाई पक्राउ गरी इलाका प्रहरी कार्यालय कञ्चनपुरमा बुझाएका थिए । महादेवा गाउँपालिका–३ का साहु वेदनारायण, राजगढ गाउँपालिका–३ का संजयकुमार यादव, सिरहा नगरपालिका–११ का विकेशकुमार मण्डल, हनुमाननगर कंकालिनी नगरपालिकाका धर्मदेव मण्डल र छिनमस्ता गाउँपालिकाका धीरजकुमार यादव अहिले प्रहरी हिरासतमा छन् ।

उनीहरूमाथि अदालतबाट म्याद थप भई डाँका तथा ज्यान मार्ने उद्योगमा अनुसन्धान भइरहेको इलाका प्रहरी कार्यालय कञ्चनपुरका प्रहरी नायब उपरीक्षक दीपक कार्कीले जानकारी दिए ।

वेदनारायणले यसअघि पनि यस्तै गरी ऋणीलाई धम्क्याउने गरेको सूचना आफूहरूले पाएको उनले बताए । वेदनारायणले कतिपय ठाउँमा ऋणीसँग वास्तविकभन्दा बढी रकम असुल गरेको मौखिक जानकारी आफूहरूले पाएको उनको भनाइ छ ।

घटनाबारे अनुसन्धान जारी छ । घटनामा संलग्न केही व्यक्ति फरार पनि भएकाले धेरै कुरा खुलाउन नमिल्ने उनले बताए ।

अढाई कट्ठा खेत र ६ लाख तिरे
विजयका बुवा भुवनेश्वरले पाँच वर्षअघि वेदनारायणसँग तीनपटकमा गरी चार लाख रुपैयाँ ऋण लिएका थिए । कहिले घरखर्च, कहिले खेती त कहिले उपचारका लागि ऋण लिइएको विजयले बताए ।

भुवनेश्वरले सुरुमा अरूसँग लिएको ऋण चुक्ता गर्न नै वेदनारायणसँग ऋण लिएका थिए । त्यति बेला वेदनारायणले उनलाई एक लाख ८० हजार रुपैयाँ एकमुष्ट दिएका थिए । त्यसबापत उनले घरसहितको अढाई कट्ठा जग्गा साहु वेदनारायणको नाममा पास गरिदिएका थिए ।

विजयका अनुसार ऋण चुक्ता गरेपछि जग्गा फिर्ता गरिदिने दुवै पक्षबीच मौखिम सहमति भएको थियो । अहिलेसम्म आफूहरूले वेदनारायणलाई ६ लाख रुपैयाँ तिरिसकेको विजयले सुनाए । भारतमा मजदुरी गरी कमाएको पैसा साहुलाई नै तिर्ने गरेको उनले बताए ।

तर, वेदनारायणले पटक–पटक धम्की दिइरहेका थिए । गत वर्षको दसैँताका विजयका बुवा भुवनेश्वरको मृत्यु भयो । त्यसपछि पनि रकम माग्दै वेदनारायणले आफूसहित परिवारलाई धक्की दिइरहेको विजयले बताए ।

स्थानीयका अनुसार वेदनारायण त्यस क्षेत्रका ठूला मिटरब्याजी हुन् । उनको डरले धेरैजना प्रहरीमा उजुरी दिनै डराउँछन् । विजयको परिवारमाथि आक्रमणपछि भने स्थानीय १० जनाले वेदनारायणविरुद्ध उजुरी दिएका छन् ।