काठमाडौं । आईसीसी क्रिकेट विश्वकप छनोटको पहिलो खेलमा जिम्बाब्वेविरुद्ध ब्याटिङ गरिरहेको नेपालले कप्तान रोहितकुमार पौडेललाई तेस्रो विकेटको रुपमा गुमाएको छ ।

हरारेस्थित हरारे स्पोर्ट्स क्लबमा जारी खेलमा रोहित ३१ रन बनाएर आउट भए । रोहितले २९ बलमा पाँच चौका प्रहार गरे ।

नेपालले अहिले ४४ ओभरको खेल सकिँदा तीन विकेट गुमाएर २४८ रन बनाएको छ । हाल क्रिजमा रहेका कुशल मल्ल ३५ र आरिफ शेख एक रनमा खेलिरहेका छन् ।

त्यसअघि, नेपालले ओपनर कुशल भुर्तेललाई ९९ र आसिफ शेखलाई ६६ रनमा गुमाएको थियो ।

नेपाल र जिम्बाब्वेबीचको एकदिवसीय अन्तर्राष्ट्रिय क्रिकेटको यो पहिलो खेल हो । नेपालले पहिलोपटक टेस्ट मान्यता प्राप्त राष्ट्रविरुद्ध एकदिवसीय अन्तर्राष्ट्रिय क्रिकेट खेल्न लागेको हो ।

नेपालले यसअघि जिम्बाब्वविरुद्ध ५० ओभरको एकमात्र खेल खेलेको छ । लिस्ट ‘ए’ मान्यता रहेको उक्त खेलमा नेपाल ११६ रनले पराजित भएको थियो ।

आईसीसी क्रिकेट विश्वकप लिग–२ का पछिल्लो १२ मध्ये ११ खेलमा जितको नतिजा निकालेको नेपाल घरेलु टिमविरुद्ध पनि सोही लयलाई निरन्तरता दिने योजनामा छ ।