काठमाडौं । प्रस्तावित प्रधानन्यायाधीश हरिकृष्ण कार्कीविरुद्धका उजुरीकर्ताले संसदीय समितिको वैधानिकतामा प्रश्न उठाउँदै समिति बहिष्कार गरेका छन् ।

संसदीय सुनुवाइ समितिले बुधबार उजुरीकर्ताहरूलाई उजुरीबारे प्रस्टीकरणका लागि समितिमा बोलाएको थियो । एक–एक गरी समिति बैठकमा गएर आफ्नो उजुरीबारे स्पष्ट पार्ने कार्यतालिका समितिले बनाएको थियो । तर, उजुरीकर्ताले त्यसलाई अस्वीकार गर्दै समितिको वैधानिकतमा प्रश्न उठाएका थिए ।

संसद्को संयुक्त बैठक तथा संयुक्त समिति कार्यसञ्चालन नियमावली राजपत्रमा प्रकाशित नभएकाले समिति नै वैधानिक नभएको उनीहरूको दाबी छ । सुरुमा उनीहरूले सामूहिक रूपमा प्रवेश पाउनुपर्ने माग राखेर बैठक कक्षको ढोकाबाहिरैबाट विरोध गरेका थिए ।

पछि उजुरीकर्ताकोतर्फबाट तीनजनाले बोल्ने सहमति भएपछि उनीहरूलाई बैठक कक्षमा प्रवेश गर्न दिइएको थियो ।

तर, बैठक कक्षमा उजुरीकर्ताहरूले समितिको वैधानिकता नै नरहेकाले सुनुवाइ गर्न नपाउने अडान लिए ।

समितिको तर्फबाट संविधानले संघीय संसद्को विशेषाधिकारको व्यवस्था गरेको बताइएको थियो । तर, उजुरीकर्ताहरूले समिति नै बहिष्कार गरेर बाहिरिए ।