काठमाडौं । यसै सिजन सहिद स्मारक ‘ए’ डिभिजन लिगमा उक्लिएको फुटबल क्लब खुमलटार पुनः दोस्रो डिभिजन लिगमा झरेको छ ।

‘ए’ डिभिजन लिगको आफ्नो अन्तिम खेलमा ‘डेब्यु’ सिजनमै लिग च्याम्पियन बनेको अर्को नवप्रवेशी चर्च ब्वाइज युनाइटेड क्लबसँग २–० ले पराजित भएपछि खुमलटार शीर्ष डिभिजन लिगबाट रेलिगेट भएको हो ।

सातदोबाटोस्थित एन्फा मुख्यालयमा तनावग्रस्त बनेको खेलमा चर्च ब्वाइज युनाइटेडलाई जित दिलाउन सुनिल साह र जोसेफ बेम्पाले गोल गरे । २१औँ मिनेटमा सुनिलले गोल गर्दै चर्च ब्वाइजलाई अग्रता दिलाएका थिए । 

पहिलो हाफको इन्जुरी समयसम्म चर्च ब्वाइजले १–० को अग्रता बनाएको थियो । तर, इन्जुरी समयमा रेफ्रीले पेनाल्टी नदिएको भन्दै प्रज्वल क्षेत्रीमाथि खुमलटारका अफिसियलले मुक्का प्रहार गरेपछि खेल करिब ४५ मिनेट नै रोकिएको थियो । आफूमाथि हातपात भएपछि रेफ्री क्षेत्रीले सुरक्षाको माग गर्दै खेल सुचारु गर्न नमानेपछि खेल लामो समय रोकिएको थियो । 

तर, एन्फाका पदाधिकारीहरूबाट सुरक्षाको प्रत्याभुत हुने आश्वासन पाएपछि क्षेत्री खेल सुचारु गर्न तयार भएका थिए । खेल सुचारु भएको केही बेरमा नै बेम्पाले गोल गर्दै चर्च ब्वाइजको अग्रतालाई दोब्बर पारेका थिए । 

जितसँगै लिगको उपाधिसहित चर्च ब्वाइजले २६ खेलबाट ४८ अंक जोड्दै लिगको अन्त्य ग¥यो । चर्चले लिगका २६ खेलमध्ये १३ खेलमा जित निकाल्यो । यता, चर्च ब्वाइजसँगै यसै सिजन शीर्ष डिभिजन लिगमा उक्लिएको खुमलटार भने तालिकाको पुछारमा रहँदै पुनः ‘बी’ डिभिजन लिगमा खस्कियो । खुमलटारले २६ खेलमा २७ अंकमात्र जोड्न सक्यो ।