काठमाडौं । नेकपा (एमाले)का सांसद पृथ्वीसुब्बा गुरुङले आउँदो आर्थिक वर्षको बजेट पञ्चायतकालीन बजेटका रूपमा पुनरावृत्ति भएको बताएका छन् ।

बिहीबार प्रतिनिधिसभा बैठकमा उनले आर्थिक वर्ष २०८०/८१ को बजेटमा प्रदेश र स्थानीय सरकारलाई दिनुपर्नेजति अधिकार नदिइएको उल्लेख गरे ।

उनले पञ्चायतकालमा प्रधानपञ्चलाई जति अधिकार र बजेट छुट्टयाइन्थ्यो, अहिले पनि त्यस्तै देखिएको टिप्पणी गरे । पञ्चायतकालीन र बहुदलकालीन बजेटको पुनरावृत्तिका रूपमा अहिलेको बजेट आएको उनको भनाइ छ ।

स्रोत व्यवस्थापन र वितरणका हिसाबले यो बजेट एकात्मकतावादी रहेको जिकिर उनले गरे । बजेटले संघीय लोकतान्त्रिक गणतन्त्रको मर्मलाई छुन नसकेको उनले बताए ।

बजेट प्रगतिशील नभएको उनले उल्लेख गरे । प्रगतिशील कर प्रणाली पनि नभएको उनले बताए । बजेटले मुलुकमा राष्ट्रिय पुँजीको विकास गर्न नसक्ने उनको धारणा छ ।