काठमाडौं । नेपाली राष्ट्रिय क्रिकेट टिमका मुख्य प्रशिक्षक मोन्टी देसाई एकदिवसीय विश्वकप छनोटका लागि आज (बिहीबार) दक्षिण अफ्रिका प्रस्थान गरेका छन् ।
विश्वकप छनोटका लागि नेपालले दक्षिण अफ्रिकामा अभ्यास सत्र राखे पनि देसाई टिमसँग गएका थिएनन् । जुन १८ देखि जुलाई ९ सम्म जिम्बाब्वेमा हुने विश्वकप छनोटको तयारी लागि नेपाली टिम जेठ १६ गते दक्षिण अफ्रिका प्रस्थान गरेको थियो । तर, टिमसँग मुख्य प्रशिक्षक देसाई र लेग स्पिनर सन्दीप लामिछाने गएका थिएनन् । सन्दीप २२ गते दक्षिण अफ्रिका गए पनि देसाई भने भिसा प्रकृयामै अड्किएका थिए ।
नेपाल क्रिकेट संघ (क्यान)का कार्यवाहक सचिव दूर्गाराज पाठकले प्रशिक्षक देसाई आज बिहानै दक्षिण अफ्रिकाका लागि उडिसकेको बाह्रखरीलाई बताए ।
“प्रशिक्षक मोन्टी देसाई दक्षिण अफ्रिका प्रस्थान गरेका छन् । उनी आज बिहान चार बजे कतार एयरवेजमार्फत त्यसतर्फ उडेका हुन् । उनी साँझसम्म दक्षिण अफ्रिका पुग्नेछन्,” पाठकले भने ।
नेपालले दक्षिण अफ्रिकामा नेदरल्यान्ड्स र स्कटल्यान्डसँग दुई तयारी खेल खेल्नेछ । नेपालले आज दिउँसो स्कटल्यान्डसँग र जुन १० मा नेदरल्यान्ड्ससँग खेल्नेछ । नेपाल र स्कटल्यान्डबीचको खेल दिउँसो १ः४५ बजेदेखि सुरु हुनेछ ।
दक्षिण अफ्रिकामा १० दिनको तयारीपछि नेपाली टिम विश्वकप छनोटका लागि जिम्बाब्वे प्रस्थान गर्नेछ ।
विश्वकप छनोटको समूह ‘ए’मा रहेको नेपालले जुन १८ मा घरेलु टिम जिम्बाब्वेविरुद्ध खेल्दै प्रतियोगिताको सुरुआत गर्नेछ । यस्तै, जुन २० मा नेपालले अमेरिकासँग, जुन २२ मा वेस्ट इन्डिजसँग र जुन २४ मा नेदरल्यान्ड्ससँग समूह चरणको अन्तिम खेल खेल्ने छ ।
नेपालले छनोटअघि जिम्बाब्वेमै दुई ‘वार्म अप म्याच’ पनि खेल्ने भएको छ । नेपालले पहिलो वार्म अप म्याचमा युनाइटेड अरब इमिरेट्स (यूएई)सँग जुन १३ मा र दोस्रो खेल जुन १५ मा ओमानविरुद्ध खेल्नेछ ।
