काठमाडौं । घोराही सिमेन्ट इन्डष्ट्री लिमिटेडले आयोजना प्रभावित स्थानीय, कर्मचारी, म्युचुअल फण्ड र वैदेशिक रोजगारीमा गएकालाई निष्कासन गरेको प्राथमिक सेयर (आईपीओ)मा न्यूनमात्रै आवेदन परेको छ । 

पछिल्लो समय सिमेन्टको व्यवसाय नै ओरालो लागेको बेला घोराहीले प्रस्तुत गरेको तथ्यांकमा शंका उब्जिएपछि निष्कासन गरेको आईपीओमा मागअनुसार आवेदन नपरेको देखिन्छ ।

यसको बलियो प्रमाण कम्पनीका कर्मचारीले नै आईपीओमा न्यून आवेदन दिएका हुन् ।  यो कम्पनीले कर्मचारीलाई भनेर तीन लाख ७७ हजार ३३१ कित्ता आईपीओ निष्कासन गरेकोमा १९ हजार ५३० जनाले मात्र आवेदन दिएका थिए । यो कर्मचारीलाई निष्कासन गरेको आईपीओको ५.१८ प्रतिशत मात्र हो ।

कुनै पनि कार्यालयमा काम गर्ने कर्मचारीलाई आफ्नो कार्यालयको बारेमा थाहा हुन्छ । तर, वास्तविक अवस्था थाहा भएर नै यो कम्पनीको आईपीओमा कर्मचारीले नै आवेदन नदिएको हुन सक्ने एक विश्लेषकको टिप्पणी छ ।

यसअघि यो कम्पनीको आईपीओलाई बोर्डले प्रिमियममा स्वीकृति गर्न दिनु नै गलत भएको बताइँदै आएको छ ।  यसको विषयमा नेपाल धितोपत्र बोर्डका अध्यक्ष रमेश कुमार हमालले नै स्पष्टीकरण दिनुपरेको थियो ।

उनले ‘भ्यालुएसन’ गरेर ल्याएको कम्पनीको कागजात मात्र बोर्डले हेर्ने पनि भनेका थिए ।  कमजोर वित्तीय विवरण भएका कम्पनीलाई सर्वसाधारणले नै अस्वीकार गर्नुपर्ने उनको भनाइ थियो । यसअघिका आईपीओमा बढी माग गर्दै स्थानीय, कर्मचारी र वैदेशिक रोजगारीमा भएका नेपालीले आवेदन दिने गरेका थिए । 

तर, यो कम्पनीको पहिलोचरणमा निष्कासन गरेको आईपीओ ५५ प्रतिशत बिक्री भएको तथ्यांक छ । स्थानीयलाई कुल तीन लाख ९७ हजार १९० कित्ता छुट्याएकोमा ७७ हजार २९० कित्ताका लागि मात्र आवेदन दिएका थिए । 

यो स्थानीयलाई निष्कासन गरेकोमध्ये १९.४६ प्रतशत हो । त्यसैगरी वैदेशिक राजगारीमा गएकाहरूले निष्कासनमध्ये ८० प्रतिशतमा आवेदन दिएका छन् भने सामूहिक लगानी कोषहरूले ८७.१८ कित्ताका लागि आवेदन दिएको छ । 

आवेदन दिएको सेयर बाँडफाँड गरेर कम्पनीले आगामी ३२ गतेदेखि सर्वसाधारणलाई आईपीओ निष्कासन गर्ने सूचना जारी गरिसकेको छ । कम्पनीले प्रतिकित्ता ४३५ रुपैयाँमा ६९ लाख ११ हजार ६७० कित्ता सेयर निष्कासन गर्न लागेको हो ।

सर्वसाधारणलाई निष्कासन गर्न लागेको उक्त सेयरमा स्थानीय, म्युचुअल फण्ड, वैदेशिक रोजगारीमा रहेका नेपाली र कर्मचारीले नकिनेको आठ लाख ७४ हजार ३८२ कित्ता सेयर पनि जोडेको छ ।

सिमेन्टको व्यापार घट्दै गएकोले दोस्रो बजारमा यो कम्पनीको सेयर मूल्य पनि कम हुने आकलनले आवेदकले प्राथमिक सेयरमा आवेदन नदिएको हुन सक्ने जानकार बताउँछन् ।

धितोपत्र दोस्रो बजारमा कारोबार भइरहेको शिवम् सिमेन्टको सेयर मूल्य ४०० रुपैयाँभन्दा तलसम्म झरेकाले पनि दोस्रो बजारमा सस्तोमा पाउने आशले यो कम्पनीको प्राथमिक सेयरमा लगानीकर्ताको आकर्षण नदेखिएको आकलन छ । शिवम्को पछिल्लो ५२ हप्तामा सेयर मूल्य ३८९ रुपैयाँसम्म झरेको थियो ।