काठमाडौं । हिन्दी सिनेमा ‘आदिपुरुष’को प्रदर्शन हुँदा भारतका सिनेमा हलले प्रत्येक शोमा एउटा सिट हनुमानका लागि भनेर खाली राख्ने भएका छन् । 

‘आदिपुरुष’ निर्माण टिमले ‘जहाँ रामायण पाठ हुन्छ, त्यहाँ भगवान हनुमान प्रकट हुन्छन् । यस विश्वासलाई सम्मान गर्दै प्रभासको फिल्म आदिपुरुष जहाँ प्रदर्शन हुन्छ त्यहाँ एक सिट विशेष रूपमा हनुमानका लागि छुट्याइनेछ,’ भनेपछि भारतका सिनेमा हलले एउटा सिट हनुमानका लागि छुट्टयाउने भएका हुन् । 

‘आदिपुरुष’ निर्माण पक्षको यो आग्रहलाई नेपालका हलले मान्लान् ?, भारतमा झैं नेपालमा पनि सिनेमा हलल हरेक शोमा एउटा सिट हनुमानका लागि भनेर खाली राख्लान् ?

“भारतले जे गर्छ हामीले पनि त्यही गर्नुपर्छ भन्ने छैन । भारतले जे गर्यो हामी त्यही गर्दैनौं,” नेपालकै ठूलो मल्टिप्लेक्स चेन क्यूएफएक्सका सञ्चालक मध्येका एक भाष्कर ढुंगानाले बाह्रखरीसँग भने, “भारतमा त हलभित्रै पूजाआजा पनि गर्छन्, तर हामी त्यो गर्दैनौं ।” 

भारतको सिको गर्नैपर्छ भन्ने नरहेको र आजसम्म क्यूएफएक्सले हनुमानका लागि सिट छुट्टयाउने निर्णय नगरेको उनले स्पष्ट पारे । यद्यपि, दर्शकले आग्रह गरेको अवस्थामा भने त्यो निर्णयमा पुग्न सकिने उनले बताए । 

ओम राउतले निर्देशन गरेको सिनेमामा प्रभास रामको भूमिकामा छन् । सैफअली खानलाई रावणको भूमिकामा देख्न सकिनेछ । कृति सेननले सीताको भूमिका निर्वाह गरेकी छन् । 

जुन १६ बाट रिलिज हुने सिनेमा ‘आदिपुरुष’ पाँच सय करोडमा बनेको हो । यो सिनेमाले रिलिजअगाडि नै ४३२ करोड भारतीय रुपैयाँमा उठाएको छ । अब यो सिनेमाले हलबाट ६८ करोड भारू मात्र कमाए लगानी सुरक्षित हुनेछ ।