विराटनगर । नेपाली कांग्रेस कोसी प्रदेश संसदीय दलले अल्पमतमा परेकोले एमाले नेतृत्वका मुख्यमन्त्री तथा मन्त्रीहरूले राजीनामा दिनुपर्ने माग गरेको छ ।
संसदीय दलका तर्फबाट प्रमुख सचेतक भुपेन्द्र राईले बुधबार प्रेस विज्ञप्ति जारी गरी कोसी प्रदेश सरकारको राजीनामा माग गरेका हुन् ।
माओवादी केन्द्र र जसपाले समर्थन फिर्ता लिइसकेको अवस्थामा सरकार अल्पमतमा परिसकेको भन्दै कांग्रेसले सदन छल्न प्रदेशसभाको बैठक अनिश्चित समयको लागि स्थगित गरिएकोप्रति पनि आपत्ति जनाएको छ ।
कोसी प्रदेशसभाको मंगलबार बैठक बसेपछि अर्को सूचना नआउन्जेलसम्मको लागि स्थगित भएको छ ।
कांग्रेसले प्रदेशसभाको बैठक स्थगित गरेर सरकारले सदनमा आउनु पर्ने सरकारको नीति तथा कार्यक्रम र वार्षिक बजेट अध्यादेशमार्फत ल्याउने तयारी गरिनु अनुचित भएको जनाएको छ ।
माओवादी केन्द्रले सरकारलाई दिएको समर्थन मंगलबार फिर्ता गरेसँगै पार्टीबाट मन्त्रीमण्डलमा रहेका दुई मन्त्रीले पनि राजीनामा दिइसकेका छन् ।
