काठमाडौं । नेकपा (एमाले)का अध्यक्ष केपी शर्मा ओलीले सरकारको बजेटमा औषधिजन्य प्रयोजनका लागि गाँजा खेतीको अध्ययन गर्ने विषय उल्लेख भएकोमा असन्तुष्टि जनाएका छन् ।
आजको प्रतिनिधिसभा बैठकमा बजेटमाथिको छलफलमा उनले कृषिमा आत्मनिर्भर बनाउने विषयमा ध्यान नदिएर 'कसले गाँजा खेती गर्न खोजेको छ ?' भन्दै प्रश्न गरे ।
“धान फलाउने, आलु फलाउने, कृषि बढाउने त्यतापट्टि छैन । खाद्यान्नमा आत्मनिर्भर भन्ने छैन । कसले गर्न खोजी रा'छ गाँजा खेती ?,” ओलीले सोधे, “कसले गर्न खोजिरहेको छ ? कसका लागि गाँजा खेती ? अचम्म लाग्छ, गाँजा खेती कसलाई चाहियो ? अहिले मान्छे दृष्टिगोचर भएको छैन । कोही छ गाँजा खेती पछाडि ?”
उनले अगाडि थपे, “गाँजाको बिउ लिएर बसेको व्यापारी को हो ? किन आउँछन् यस्ता फेन्सी कुरा ? जनताका हितभन्दा पर यस्ता कुरा किन आउँछन् ?”
एमाले नेता शेरबहादुर तामाङसहितले गाँजा खेतीलाई कानुनी मान्यता दिनुपर्ने माग राख्दै आएका छन् ।
