काठमाडौं । यस वर्षको युगकवि सिद्धिचरण पुरस्कार प्रा. डा. जयराज आचार्यले पाएका छन् । युगकवि सिद्धिचरण प्रतिष्ठानले गरेको निर्णयअनुसार राष्ट्रपति रामचन्द्र पौडेलबाट पुरस्कार प्रदान गरिएको हो ।
सिद्धिचरणको ११२औँ जन्मजयन्तिका अवसरमा सोमबार शीतलनिवासमा भाषा, साहित्य र कुटनीतिक क्षेत्रमा पुर्याएको योगदानका लागि डा आचार्यलाई पुरस्कार प्रदान गरिएको हो । पुरस्कारको राशि एक लाख नगदसहित सम्मानपत्र रहेको छ ।
यस्तै, राष्ट्रपति पौडेलले यसवर्षको युगकवि सिद्धिचरण युवा पत्रकारिता पुरस्कार पत्रकार चेतनाथ धमलालाई प्रदान गरे । सिद्धिचरण युवा पत्रकारिता पुरस्कारको राशि २५ हजार नगदसहित सम्मानपत्र रहेको छ ।
कार्यक्रममा प्रतिष्ठानका अध्यक्ष वैरागी काइला, संरक्षक तथा युगकवि श्रेष्ठका छोरा रविचरण श्रेष्ठ, प्रा.डा मोहन लोहनीले युगकवि सिद्धिचरणको साहित्य साधना, बहुआयामिक व्यक्तित्व र कृतित्वबारे चर्चा गरेका थिए ।
