काठमाडौं । प्रतिनिधिसभा अन्तर्गतको शिक्षा, स्वास्थ्य तथा सूचना प्रविधि समितिको कार्यविधि पास गरिएको छ । समितिको आइतबार बिहान बसेको १० दलीय सदस्यसहितको बैठकले कार्यविधि पास गरेको हो ।
समितिले बैठकको निर्णयबाट दिइएको निर्देशन सम्बन्धित निकायले पालना गरे/नगरेको कडाइँका साथ अनुगमन तथा मूल्यांकन गर्ने कार्यविधिमा उल्लेख छ ।
त्यसका लागि सम्बन्धित निकायमा पुगेरै उपसमितिहरूले अनुगमन गर्ने तथा बैठकमा बोलाएर समेत जवाफ मागिने समिति सदस्य बद्रीप्रसाद पाण्डेले बताए ।
त्यस्तै लगातार पाँचवटा बैठकमा बिनाअनुपस्थित रहने सदस्यलाई समितिबाट हटाउन सभापतिले सिफारिस गर्ने पनि कार्यविधिमा उल्लेख छ । यो व्यवस्थालाई समेत कडाइँका साथ पालना गरिने पाण्डेले बताए ।
समितिको बैठक प्रत्येक १५ दिनमा एकपटक बस्नेछ । बैठकमा उपस्थिति यकिन गर्न विद्युतीय हाजिरीको प्रस्ताव कार्यविधिले गरेको छ ।
