काठमाडौं । सहिद स्मारक ‘ए’ डिभिजन लिगको समापन नजिकिँदै गर्दा विदेशी खेलाडीको श्रम सम्झौता समाप्त भएपछि आज क्लबहरुले उनीहरुबिना नै प्रतिस्पर्धा गरेका छन् । श्रम सम्झौता समाप्त भएका कारण बिहीबार फ्रेन्ड्स क्लब र हिमालयन शेर्पा क्लब विदेशी खेलाडीबिना नै प्रतिस्पर्धामा उत्रिए ।

“प्राय सबै खेलाडीको श्रम सकिएको छ । त्यही भएर आज खेल्न पाएनन् । आज खेल हुने समयसम्म बन्ने आशा थियो, तर भएन । सबै प्रक्रियामा छ । चाँडै बन्ने विश्वास गरौँ,” नेपाल आउने विदेशी खेलाडीको श्रमको काम हेर्ने सगुन तन्डुलकारले भने ।

लिगका लागि हिमालयन शेर्पाले म्यानुयल नाना आग्योमांग, पिस्टोन मुतम्बा, अबायोमी फाल्कुने र दिवस उराइलाई अनुबन्ध गर्दा फ्रेन्ड्सले टोरिक जेब्रिन, अख्रोरबेक उक्ताभोव, रफिक एमिनु र बेन नास क्वोन्सालाई विदेशी खेलाडीको कोटामा अनुबन्ध गरेको थियो ।

तर, च्यासल रंगशालामा बिहीबार फ्रेन्ड्स र हिमालयन शेर्पाले गोलरहित बराबरी खेल्दै अंक बाँड्दा भने यी खेलाडी टिमको लाइनअपमा देखिएनन् ।

श्रमको मिति कायम रहेकाले आजै भएको न्युरोड टिम (एनआरटी) र नेपाल पुलिस क्लब भने विदेशी खेलाडीसहित मैदान उत्रिए । त्रिपुरेश्वरस्थित दशरथ रंगशालामा सम्पन्न खेलमा मोसेस त्वमले गरेको गोल निर्णायक बनेपछि पुलिसले महत्वपूर्ण तीन अंक सुनिश्चित गरेको थियो ।

आजैको तेस्रो खेलमा नवप्रवेशी फुटबल क्लब खुमलटार पनि मनाङ मस्र्याङ्दीसँग विदेशी खेलाडीबीना नै प्रतिस्पर्धामा छन् । मनाङको टिममा पनि साहिद अजिज, डियावान्डोउ डियाग्ने र कोफी काउडो छैनन् ।

फागुन तेस्रो हप्तादेखि डबल राउन्ड रोविन पद्दतिमा भइरहेको लिगमा अब अन्तिम तीन (केही क्लबको चार) खेलको नजितामात्र आउन बाँकी छ । लिगको सुरुआतदेखि नै सबै क्लबका प्रशिक्षकहरुले लिगमा विदेशी खेलाडी प्रभावकारी रहेको बताइरहँदा अन्तिम केही चरणका खेलमात्र बाँकी रहँदा विदेशी खेलाडी नहुनु क्लबहरुका लागि ठूलो घाटा हुनसक्ने देखिन्छ ।

अझ फ्रेन्ड्स र खुमलटार तालिकाको रेलिगेसन क्षेत्रमा छन् । रेलिगेसन क्षेत्रभन्दा माथि रहेको क्लब दुई अंकमात्र अघि छन् । एक खेलको नतिजाले रेलिगेसन समीकरणमा ठूलो प्रभाव पार्ने अवस्था रहँदा ‘गेम चेन्जर’ सावित बनिरहेका विदेशी खेलाडी नहुनुले क्लबलाई ठूलो नोक्सान गर्ने निश्चित छ ।

२३ खेलको नतिजा आउँदा हिमालयन शेर्पा ३० अंकसहित छैटौँ स्थानमा छ । समान खेलबाट २५ अंक जोडेको फ्रेन्ड्स तालिकाको १३औँ स्थानमा छ । फ्रेन्ड्सभन्दा माथि रेलिगेसनबाट बाहिर रहेको संकटाको २७ अंक छ ।

एनआरटीलाई हराएको पुलिस ३४ अंकसहित चौथो स्थानमा छ । कुनै समय तालिकाको रेलिगेसन क्षेत्रमा रहेको पुलिसको नतिजामा विदेशी खेलाडी आएपछि नै सुधार आएको हो ।

तालिकाको शीर्ष स्थानमा रहेको चर्च ब्वाइज युनाइटेडले ४१ अंक जोडेको छ । दोस्रो स्थानको मछिन्द्र र तेस्रो स्थानको जावलाखेलको खातामा क्रमशः ३९ र ३७ अंक छ ।