काठमाडौं । विभागीय टोली त्रिभुवन आर्मी फुटबल क्लबलाई हराउदै जावलाखेल युथ क्लबले सहिद स्मारक 'ए' डिभिजन लिगमा उपाधि सम्भावना कायम राखेको छ ।
मंगलबार त्रिपुरेश्वरस्थित दशरथ रंगशालामा सम्पन्न खेलमा आर्मीलाई २–० ले पराजित गर्दै जावलाखेलले रोचक बनेको उपाधि होडमा कायम राखेको हो ।
जावलाखेललाई जित दिलाउन दुवै गोल एन्कोटो मासोबीले गरे । जावलाखेलले दुवै गोल दोस्रो हाफमा गरेको थियो ।
खेलको ५६औँ मिनेटमा मासोबीले जावलाखेललाई अग्रता दिलाएका थिए । यस्तै, ७९औँ मिनेटमा मासोबीले नै गोल गर्दै जावलाखेलको अग्रता दोब्बर पारेका थिए ।
जितसँगै २३ खेलबाट २३ खेलबाट ३७ अंक जोडेको जावलाखेल तालिकाको दोस्रो स्थानमा उक्लिएको छ । जुन शीर्ष स्थानमा आसिन चर्च ब्वाइजको भन्दा एक अंक कम हो । जावलाखेलभन्दा एक खेल कम खेलेको चर्च ब्वाइजको ३८ अंक छ ।
यता, समान खेलबाट ३० अंक जोडेको आर्मी तालिकाको पाचौँ स्थानमा छ ।
