काठमाडौं । आगामी आर्थिक वर्ष २०८०/८१ को बजेट वक्तव्यमा दशौँपटक भरतपुर क्यान्सर अस्पतालका लागि पेट स्क्यान मेसिन खरिदको विषय समेटिएको छ । १० वर्षअघि आर्थिक वर्ष २०७०/०७१ को बजेटमा भरतपुर क्यान्सर अस्पतालमा पेट स्क्यान मेसिन र त्यसका लागि साइक्लोट्रोन खरिदका लागि १६ करोड रुपैयाँ छुट्याइएको थियो ।
सोही शीर्षकमा सरकारले आर्थिक वर्ष ०७१/७२ मा ४५ करोड, ०७२/७३ मा ४० करोड, २०७३/७४ मा ५५ करोड रकम विनियोजन गरेको थियो । तर, मेसिन खरिद हु्न भने सकेन बरु वर्षैपिच्छे बजेट फ्रिज भइरह्यो । आर्थिक वर्ष २०७४/०७५ को बजेटमा यो विषय नछोइए पनि आर्थिक वर्ष २०७५/०७६ मा भरतपुुर अस्पतालमा पेटस्क्यान मेसिन खरिद गर्न भन्दै सरकारले पुनः २० करोड रुपैयाँ छुुट्यायो ।
आर्थिक वर्ष २०७६/०७७ को बजेटमा ‘बीपी कोइराला क्यान्सर अस्पताल भरतपुर क्यान्सर अस्पताल’को विस्तारित सेवाका लागि आवश्यक रकम भन्ने शीर्षक समेटियो । त्यस्तै, ०७७/०७८ तथा ०७८/०७९ को बजेटमा नछोइएको यो विषय फेरि ०७९/०८० मा समेटियो ।
चालुु आर्थिक वर्षको बजेटमा भरतपुुर क्यान्सर अस्पतालमा पेट स्क्यान मोसिन तथा साइक्लोट्रोन उत्पादन गर्ने मेसिन खरिद गर्न आवश्यक रकम विनियोजन गरिएको उल्लेख छ ।
आगामी आर्थिक वर्ष २०८०/०८१ का लागि अर्थमन्त्री प्रकाशशरण महतद्वारा प्रस्तुत बजेट वक्तव्यमा पनि ‘भरतपुर क्यान्सर अस्पतालमा पेट स्क्यान मेसिन तथा साइक्लोट्रोन उत्पादन गर्ने मेसिन खरिद गर्न आवश्यक रकम विनियोजन गरिएको’ उल्लेख छ ।
