काठमाडौं । नायक तथा निर्माता नवल खड्का एक लाख ५० हजार रुपैयाँ नगदसहित सम्मानित भएका छन् । सुरेन्द्र ढकाल प्रतिष्ठानले नायक खड्कालाई एक लाख ५० हजार रुपैयाँ नगदसहित सम्मान गरेको छ ।  

ग्रेटर नेपाल महाअभियानले आयोजना गरेको भ्रष्टाचारविरुद्ध एक कार्यक्रम आयोजना गरेको सभामा सुरेन्द्र ढकाल प्रतिष्ठानका संयोजक डा. ढकालले भ्रष्टाचारीलाई समाजमा बहिष्कार गर्दै देश निर्माणमा कटिबद्ध भएका व्यक्तिलाई प्रोत्साहन गर्नु पर्ने बताए । यसैक्रममा चलचित्र ‘दशगजा’, ‘आवाज’, ‘क्रान्ति’, ‘भिमदत्त’, ‘काँडेतार’लगायत चलचित्रका नायक तथा निर्माता खड्कालाई सम्मान गरेको बताए ।
 
उक्त सभामा खड्काले सम्मानले देशका लागि केही गरेर देखाउने प्रोत्साहन मिलेको बताए । सीमामा काँडेतार बार लगाउनु पर्छ भनेर खुला प्रस्ताव गरेको बताए । “यो प्रस्तावमा संसद्मा वहस होस् । देशविदेशमा बहस होस्,” उनले भने । 

नक्कली भुटानी शरणार्थी प्रकरण खुला सीमाका कारण भएको भन्दै उनले सीमामा काँडेतार लगाउन आवश्यक भएको बताए ।