काठमाडौं । आकाश माधवलको उत्कृष्ट बलिङप्रेरित मुम्बई इन्डियन्सले लखनउ सुपर जायन्ट्सविरुद्ध ८१ रनको फराकिलो जित निकाल्दै इन्डियन प्रिमियर लिग (आईपीएल) को दोस्रो क्वालिफायरमा खेल्ने भएको छ ।

बुधबार राति चेन्नाईमा भएको इलिमिनेटरमा मुम्बईले प्रस्तुत गरेको १८३ रनको लक्ष्य पछ्याउने क्रममा लखनउले १६.३ ओभरमा सबै विकेट गुमाएर १०१ रनमात्र जोड्न सक्यो । मुम्बईविरुद्ध लखनउका तीन ब्याटरले मात्र दोहोरो अंकमा रन जोड्न सके । मार्कुस स्टोइनिसले ४०, काइल मयेर्सले १८ र दीपक हुडाले १५ रन जोडे ।

लखनउलाई सस्तैमा समेट्न मुम्बईका कशिलो बलिङ गरेका आकाशले पाँच विकेट लिए । ३.३ ओभर बलिङ गरेका आकाशले पाँच रनमात्र खर्चिए । यसबाहेक, क्रिश जोर्डन र पियुश चावलाले समान एक विकेट लिए ।

त्यसअघि, टस जितेर ब्याटिङमा आएको मुम्बईले निर्धारित २० ओभरमा आठ विकेट गुमाएर १८२ रनको योगफल खडा गरेको थियो ।मुम्बईका म्यामरुन ग्रीनले ४१ रन बनाएका थिए । सूर्यकुमार यादवले ३३, तिलक वर्माले २६, नेहल वाधेराले २३, रन बनाए । इशान किशनले १५, टिम डेविडले १३ र कप्तान रोहित शर्माले ११ रन थपे ।

लखनउका नवीन उल हकले चार विकेट लिएका थिए । यश ठाकुरले तीन विकेट लिँदा मोसिन खानको नाममा एक विकेट रह्यो ।

मुम्बईले अब फाइनल प्रवेशका लागि दोस्रो क्वालिफायरमा साविक विजेता गुजरात टाइटन्सविरुद्ध खेल्नेछ । यसअघि मंगलबार भएको पहिलो क्वालिफायरमा गुजरातलाई हराउँदै चेन्नाई सुपर किङ्सले फाइनलमा स्थान बनाएको थियो । मुम्बई र गुजरातबीचको क्वालिफायर शुक्रबार हुनेछ ।