काठमाडौं । सत्तासाझेदार दल जनता समाजवादी पार्टी (जसपा)का सांसद राजकिशोर यादवले पटक–पटक प्रधानमन्त्री बनेकाहरूले जनता हँसाउने काम गरिरहेको बताएका छन् ।

अहिलेको सरकारले ल्याएको नीति तथा कार्यक्रमले जनता र युवालाई नेपाल बनाउने सपना देखाउने र विश्वास जगाउने काम गर्न नसकेको उनले उल्लेख गरे ।

सोमबार प्रतिनिधिसभा बैठकमा उनले नीति तथा कार्यक्रममा सांसदहरूले राखेको टिप्पणी ‘दोहोरीमा रूपान्तरण’ भएको भन्दै नेपाली जनताले यो दोहोरी हेर्न नचाहेको बताए ।

“आफूचाहिँ पटक–पटक प्रधानमन्त्री हुने, मन्दीमा गयो, यो गर्न दिएन, त्यो गर्न दिएन भनेर के हुन्छ ? जनता हँसाउने काम नगर्नुस्,” उनले भने, “यो नीति तथा कार्यक्रम हेर्दा कन्फुजनहरूको सँगालो हो । यसमा स्पष्ट हुनुपर्छ र पोेलिसीमा डिपाचार नगर्ने, भएका काम टालटुल गर्ने अनि नयाँ नेपाल बनाउँछु भनेर हुन्छ ?”

नेपाली राजनीतिमा अब पुराना दल नसच्चिए सकिनुको विकल्प नभएको उनले उल्लेख गरे ।

उनले मधेससँग सौताको व्यवहार हुने गरेको गुनासो पनि गरे । उपयोगका नाममा चुरेको दोहन र मधेस मरुभूमिकरण गर्ने काम हुँदै गएको उनले बताए ।

“यहाँ पूर्वप्रधानमन्त्रीको कुरा र माननीयहरूको कुरा सुन्दा दोहोरी सुनेजस्तो लाग्यो,” उनले भने, “यहाँ दाहिनेपट्टि बस्नेहरूले सबै कुरा सुधार र चमात्कार भएको छ भन्छन्, अनि यताबाट उता जानेबित्तिकै कागजको खोस्टो हो, यसले केही हुँदैन भन्ने चलन छ ।”