काठमाडौं । जी–७ का नेताहरूको वार्षिक शिखर सम्मेलन जापानको हिरोशिमामा जारी छ । विश्वको ठूलो अर्थतन्त्र भएका सात देशको समूह हो, ग्रुप अफ सेभेन (जी–७) ।

युक्रेनी राष्ट्रपति भ्लोदिमिर जेलेन्स्की शनिबार बिहान अचानक सो सम्मेलनमा पुगेका थिए । आज उनले सम्मेलनमा सम्बोधन गर्ने बताइएको छ । जी–७ का नेताहरूले युक्रेनका लागि थप सैन्य सहायता प्याकेज घोषणा गर्ने पनि बताइएको छ ।

जेलेन्स्कीले विश्वभरका नेताहरूसँग थप सैन्य सहायता मागिरहेका छन् । उनले आज बिहान क्यानाडाका प्रधानमन्त्री जस्टिन ट्रुडो र इन्डोनेसियाका राष्ट्रपति जोको विडोडोसँग द्विपक्षीय वार्ता गरेका छन् ।

जी–७ का नेताहरूले रुसबाट हिरा र अरू व्यापारिक आयातमा प्रतिबन्ध लगाएका छन् ।

किभलाई अत्याधुनिक लडाकु विमान एफ–१६ दिन पनि यो समूहका सबै नेताहरू तयार भएका छन् । अमेरिका यसअघि उक्त विमान दिन नहुने पक्षमा थियो । गएको जनवरीमा अमेरिकी राष्ट्रपति जो बाइडेनले युक्रेनलाई यो लडाकु विमान पठाउनु युद्धमा आफ्नो प्रत्यक्ष संलग्नता हुन जाने बताएका थिए । अहिले उनी पनि एफ–१६ पठाउन अनुमति दिन तयार भएका हुन् ।

सम्मेलनमा नेताहरूले चीनले धेरै देशविरुद्ध आर्थिक जबरजस्ती प्रयोग गरेको भन्दै चेतावनी पनि दिएका छन् ।

जी–७ का नेताहरूले पहिले नै आफ्नो शिखर सम्मेलनको विज्ञप्ति जारी गरिसकेका छन् । विज्ञप्तिमा रुसको निन्दा गरिएको छ । बेइजिङले जी–७ को आरोपप्रति कडा असन्तुष्टि व्यक्त गरेको छ । चीनले सम्मेलनको आयोजक जापानको पनि आलोचना गरेको छ ।

अमेरिका, बेलायत, क्यानडा, फ्रान्स, जर्मनी, इटाली र जापान रहेको जी–७ ले यो वर्षको सम्मेलनमा थप आठ राष्ट्रलाई निम्तो पठाएको थियो । युरोपियन युनियन (ईयू) पनि यसको गणना नहुने सदस्य हो । बीबीसी र अलजजिराबाट ।