काठमाडौं । नेपालका प्रथम राष्ट्रपति डा. रामवरण यादवले कांग्रेस सहरकेन्द्रित भएको आरोप लगाएका छन् । बुधबार काठमाडौंमा आयोजित प्रजातान्त्रिक विचार समाजको १२औँ राष्ट्रिय महाधिवेशनमा उनले यस्तो बताएका हुन् ।

गिरिजप्रसाद कोइराला रहुन्जेलसम्म गाउँगाउँमा पुगेर पार्टीका कुरा बुझ्ने प्रचलन भए पनि अहिले विस्तारै हराउँदै गएको उनको भनाइ छ ।

उनले अहिले कांग्रेस केन्द्रीय समितिमा धेरै सदस्य रहे पनि त्यसको सही सदुपयोग हुन नसकेको टिप्पणी गरे । निर्वाचनका बेला आधा मात्र केन्द्रीय सदस्य जिल्लामा खटाएको भए निर्वाचनको नतिजा अर्कै हुने उनले बताए ।

“कांग्रेस सहरकेन्द्रित मात्रै भयो । गिरिजाप्रसाद कोइरालाहरू गाउँकेन्द्रित हुनुहुन्थ्यो, केही समस्या भए उहाँ जिल्ला–जिल्लामा जानुहुन्थ्यो, हामीलाई खटाउनुहुन्थ्यो,” उनले भने, “पहिला केन्द्रिय समितिमा ३०÷३५ जना थियौँ, अहिले बथानै हुनुहुन्छ । कमसेकम आधालाई जिल्ला–जिल्लामा खटाइदिएको भए कम्तीमा एउटामा दुईजना पुग्थे । अरू पार्टीका पार्टीका सदस्यहरू ग्रासरुट गरिरहेका छन् । तपाईंहरू यहाँ बसिरहनुहुन्छ ।”