काठमाडौं । नक्कली भुटानी शरणार्थी प्रकरणमा मुछिएका संविधानसभा सदस्य आङटावा शेर्पाको आज बयान लिइँदै छ । आजै उक्त प्रकरणका अरू १२ आरोपितको थप बयान लिइँदै छ ।

शेर्पाको प्रारम्भिक र अरू १२ आरोपितको थप बयान लिइने जिल्ला सरकारी वकिलको कार्यलय काठमाडौंका प्रवक्ता एवं सहन्यायाधिवक्ता अच्युतमणि नेउपानेले जानकारी दिए ।

शेर्पाविरुद्ध गएको शुक्रबार पक्राउ पुर्जी जारी भएको थियो । तर, अदालत र प्रहरीले त्यसबारेमा केही खुलाएका थिएनन् । सोमबार शेर्पा आफैँ प्रहरीसमक्ष पुगेका थिए । त्यति बेला उनी आफ्नो विषयमा मिडियामा आएका समाचारबारे बुझ्न आएको जिल्ला प्रहरी परिसर काठमाडौंले जनाएको थियो ।

• आफैँ प्रहरीकहाँ पुगे आङटावा शेर्पा, प्रहरी भन्छ– पक्राउ पुर्जी नै जारी भएको छैन

त्यसपछि उनलाई अनुसन्धानका लागि हिरासतमा राखिएको थियो । उनलाई तीन दिन हिरासतमा राखेर अनुसन्धान गर्न मंगलबार काठमाडौं जिल्ला अदालतले अनुमति दिएको छ ।

हालसम्म यो प्रकरणमा १४ जना पक्राउ परेका छन् । अदालतले तत्कालीन गृहमन्त्री रामबहादुर थापा ‘बादल’का छोरा प्रतीकविरुद्ध पनि पक्राउ पुर्जी जारी गरिसकेको छ । उनी फरार छन् ।

नेपाली नागरिकलाई भुटानी शरणार्थी बनाई विदेश पठाइदिने भन्दै रकम असुली गरी ठगी गरेको उजुरीपछि यो प्रकरणमा अनुसन्धान जारी छ ।