काठमाडौं । पूर्वराष्ट्रपति विद्यादेवी भण्डारीले नेपाल–भारतबीचको भौगोलिक सीमालाई चुस्त र स्पष्ट राख्नुपर्ने बताएकी छन् ।

कालापानी, लिपुलेक र लिम्पियाधुरा नेपाली भूभाग भएको उल्लेख गर्दै उनले दुई मुलुकबीचको भौगोलिक सीमालाई सम्पूर्ण रूपले चुस्त र स्पष्ट राख्नुपर्ने औँल्याएकी हुन् ।

शनिबार काठमाडौंमा आयोजित एक कार्यक्रममा उनले दुई देशबीच सदिऔँदेखि रहँदै आएको जनस्तर, सांस्कृतिक र कूटनीतिक सम्बन्धलाई थप सुदृढ र सुमधुर तुल्याउन पनि भौगोलिक सीमासम्बन्धी सबै समस्या हल गरेर अघि बढ्नुपर्नेमा जोड दिइन् ।

कालापानी, लिपुलेक र लिम्पियाधुरा नेपालले आफ्नो नक्सामा समावेश गरेर संविधानको अंग बनाएसँगै मलुुकको सार्वभौमिकता, राष्ट्रिय एकता र राष्ट्रियताप्रति ऐतिहासिक रूपमै नयाँ चेतनाको सञ्चार भएको उनले उल्लेख गरिन् । त्यसलाई कार्यान्वयनमा लैजान दुई मुलुकका राजनीतिक तथा कूटनीतिक नेतृत्वले विशेष ध्यान दिनुपर्ने उनले बताइन् ।

उनले एक राष्ट्रले अर्कोको संवेदनशीलतालाई ख्याल गरेर अघि बढ्दा मात्र आपसी सम्बन्धलाई अझ सदृढ र विश्वासिलो बनाउँदै लैजान सकिने विचार व्यक्त गरिन् । नदी प्रणालीको संरक्षण र सम्वद्र्धन गरी अघि बढ्न सके नेपालले आर्थिक रूपमा ठूलो प्रगति गर्ने उनको भनाइ छ ।