विराटनगर । मोरङको बूढीगंगा गाउँपालिकाका एक व्यक्ति एक लाख ३२ हजार भोल्ट विद्युत् प्रवाह भइरहेको हाइटेन्सन लाइनको पोलमा बसेको नौ घण्टा भएको छ ।
बूढीगंगा–७, डंग्राहाका ४० वर्षीय दिनेशकुमार माझी सडकमा निर्माण भइरहेको रिटेनिङ वालको काम रोक्न माग गर्दै हाइटेन्सन लाइनको पोलमा चढेका हुन् ।
उनी शनिबार बिहान करिब ६ बजे हाइभोल्टेज पोलमा चढेका थिए । गाउँपालिकाले निर्माण गरेको सडक तथा रिटेन्सन वालको गुणस्तरमा प्रश्न उठाउँदै उनी पोलमा चढेका हुन् ।
गाउँपालिकाका अध्यक्ष जितनारायण थापा आएर आफूसँग प्रत्यक्ष छलफल नगरुन्जेल पोलबाट नओर्लने उनको अडान छ ।
जिल्ला प्रहरी कार्यालय मोरङका प्रवक्ता एवं डीएसपी रन्जनकुमार दाहालले पोल क्षेत्रमा नेपाल प्रहरीले पहरा दिए पनि उनलाई झार्न जबर्जस्ती गर्ने अवस्था नरहेको बताए ।
“हाम्रो विशेषज्ञ टोलीले उहाँलाई तल लिएर आउन सक्छन् । तर, माथि चढ्दा उहाँबाट केही भवितव्य नहोसु भन्नेतर्फ सतर्क रहेका छौँ,” उनले भने ।
गाउँपालिकाका अध्यक्ष थापामगरलाई आफूहरूले आउन आग्रह गरेको र उनी धनकुटाबाट मोरङका लागि हिँडिसकेको भन्ने जानकारी पाएको डीएसपी दाहालले बताए ।
गाउँपालिकाका अध्यक्ष थापामगर र उपाध्यक्ष अमृताकुमारी गच्छदार थारुले आफ्नो मागलाई बेवास्ता गरे आत्मदाह गर्नेसम्मको चेतावनी ती व्यक्तिले दिएका छन् ।
माझीले गाउँपालिकाका अध्यक्षलगायत जनप्रतिनिधिले काम रोक्ने र गुणस्तरीय निर्माण गर्ने प्रतिबद्धतता जनाउनुपर्ने माग गरेका छन् ।
शनिबार नै बूढीगंगा गाउँपालिकाका अध्यक्ष र वडाध्यक्ष जिल्लाबाहिर धनकुटा गएको बताइएको छ ।
नेपाल विद्युत् प्राधिकरणले उक्त पोल भई प्रवाह भइरहेको बिजुली रोकेको छैन । लाइन काट्दा झापासहितका पूर्वी पहाडी जिल्लाको विद्युत् सेवा अवरुद्ध हुने भएकाले नकाटिएको जनाइएको छ ।
ती व्यक्तिलाई उद्धार गर्न १५ देखि २० मिनेटसम्म विद्युत् बन्द गर्न सकिने प्राधिकरणले सुरक्षा निकायलाई जानकारी गराएको छ ।
