काठमाडौं । धादिङको गल्छी गाउँपालिका–८ का विनोद थापामगर बुधबार राति खाजा खान होटेलमा छिरे ।
निबुवाबोटस्थित शानदार होटेल एण्ड लजमा खाजा खाइसकेपछि पैसाको विषयमा भनाभन हुन थाल्यो ।
होटेलमा खाएको पैसाको विषयमा होटेल सञ्चालिका सरस्वती पनेरु (पण्डित) सँग थापाको केहीबेर विवाद चल्यो ।
विवादपछि पण्डितले आफ्ना छोरा निरजलाई बोलाइन् । साथी किरण रानामगरलाई समेत लिएर होटेल पुगेका निरजले विनोदलाई सुरुमा पाँच–सात मुक्का प्रहार गरे ।
त्यसपछि आफूले साथमा ल्याएको फोल्डिङवाला छुरा प्रहार गरेर विनोदलाई घाइते बनाए । स्थानीयले घटनाको बारेमा थाहा पाएपछि विनोदलाई उपचारका लागि काठमाडौं लगियो ।
विनोदको उपचारका क्रममा काठमाडौंस्थित नर्भिक अस्पतालमा बिहीबार बिहान पौने दुई बजे मृत्यु भएको धादिङका प्रहरी उपरीक्षक गौतम मिश्रले जानकारी दिए ।
“खाजा खाएको पैसा दिन आनाकानी भएपछि विवाद उत्पन्न भएर हत्या गरिएको प्रारम्भिक अनुसन्धानमा खुुलेको छ,” प्रहरी उपरीक्षक मिश्रले भने ।
घटनामा प्रयोग भएको छुरा घटनास्थलदेखि ३० मिटर उत्तरतर्फ त्रिशुली नदितर्फको किनारमा आज बिहान फेला पारिएको प्रहरीले जानकारी दिएको छ ।
घटनामा संलग्न ४७ वर्षीया सरस्वती पनेरु (पण्डित), उनका छोरा २६ वर्षीय निरज पण्डित र पाल्पाको तानसेन नगरपालिका–१४ घर भई हाल गल्छी–८ मा बस्दै आएका किरन रानालाई पक्राउ परिएको प्रहरी उपरीक्षक मिश्रले बताए । निरजलाई प्रहरीले वडा नं ७ स्थित जंगलमा लुकेर बसेको अवस्थामा पक्राउ गरेको हो ।
तिनैजनालाई कर्तव्य ज्यान मुद्दामा सम्मानित धादिङ जिल्ला अदालतबाट तीनदिन म्याद थप अनुमती लिई अनुसन्धान कार्य जारी गरिएको छ ।
पक्राउ परेकामध्येकी सरस्वतीमाथि केटीहरूलाई डर, त्रास, प्रलोभनमा पारी वेश्यावृद्धिमा लगाई मानव बेचबिखन गरेको उजुरी समेत परेको छ । सो आधारमा मानव बेचबिखन तथा ओसारपसार मुद्दामा समेत म्याद थप गरिएको जिल्ला प्रहरी कार्यालय धादिङले जनाएको छ ।
