काठमाडौं । नेपाल उद्योग वाणिज्य महासंघका वरिष्ठ उपाध्यक्ष अन्जन श्रेष्ठले अर्थमन्त्री र गभर्नरको कुराले व्यवसायी त्रासमा रहेको बताएका छन् । बुधबार नेपाल उद्योग वाणिज्य महासंघले आयोजना गरेको प्रि–बजेट छलफलमा बोल्दै वरिष्ठ उपाध्यक्ष श्रेष्ठले यस्तो बताएका हुन् ।

अर्थमन्त्री डा. प्रकाशशरण महतले पछिल्लोपटक वित्त नीति ‘टाइट’ भएको भन्दै मौद्रिक नीतिबाट समस्या समाधान खोज्ने बताएका थिए । 

त्यस्तै, त्यस भनाइलाई काउन्टर दिँदै केही दिनअघि नेपाल राष्ट्र बैंकका गभर्नर महाप्रसाद अधिकारीले राष्ट्र बैंकले ठूलो भार बोक्न नसक्ने, जबर्जस्ती बोकाए दुर्घटना हुने बताएका थिए । सोही अभिव्यक्तिलाई लक्षित गरी श्रेष्ठले व्यवसायी त्रासमा रहेको बताए ।

“अर्थमन्त्रीज्यूले केही दिनअघि फिस्कल पोलेसी टाइट भएको भन्दै मौद्रिक नीतिबाट व्यवसायीका समस्यको समाधान खोज्ने भन्नुभएको थियो । तर, गभर्नरज्यूले राष्ट्र बैंकले ठूलो भारी बोक्न नसक्ने बताउनु भयो,” उनले भने, “ती कुराले व्यवसायी त्रासमा छन् । बजेटले व्यवसायीका कुरालाई सम्बोधन गरोस् । टार्ने काम नहोस् ।”

त्यस्तै, बजेटले उत्पादन र रोजगारी सृजना गर्नमा जोड दिनुपर्ने पनि उनको भनाइ थियो ।