काठमाडौं । राष्ट्रिय स्वतन्त्र पार्टीका सभापति तथा सांसद रवि लामिछानेले सरकारले ल्याएको विनियोजन विधेयकको सिद्धान्त र प्राथमिकता कर्मकाण्डीमात्र भएको बताएका छन् । उनले अहिलेको अर्थतन्त्रको विषम परिस्थितिबाट देशलाई पार लगाउन सरकारको प्रयास प¥याप्त नहुने बताए ।

सोमबारको प्रतिनिधिसभा बैठकमा आर्थिक वर्ष २०८०/८१ को लागि विनियोजन विधेयकका सिद्धान्त र प्राथमिकता सम्बन्धमा (कर प्रस्तावबाहेक) माथिको छलफलमा बोल्दै उनले विगतमा वर्षमा जस्तै ‘गरिने छ’ले भरिएको तर तात्विक रुपमा केही फरक नभएको र यो नियमित कर्मकाण्डीमात्र भएको उल्लेख गरे ।

“वितग वर्षमा दस्तावेज लिएर वाक्य र शब्दहरु हेरफेर गरी नियमित कर्मकाण्डी दस्ताबेजको रुपमा यो आएको हामीले लिएका छौं,” उनले भने ।

सांसद लामिछानेले आठ महिनामा गत वर्षभन्दा कम राजस्व संकलन भएको र पाँच दशकमै पहिलोपटक राजश्व संकलन अघिल्लो वर्षभन्दा कम हुने जोखिम देखिएको उनले जिकिर गरे । उनले जनतालाई झुक्याउने र कर्मकाण्डी योजनाले राज्यप्रति जनताको विश्वास कसरी बढाउँछ ? भन्दै प्रश्न गरे ।

सांसद लामिछानेले सरकारलाई अर्थव्यवस्था सुधार गर्न केही सुझाव पनि दिएका छन् । उनले साधारण खर्च कटौती गर्नुपर्नेमा जोड दिए ।

“बजेटमा गर्छौँ भनेको कुरा गरेरै छाडौं । यदि गर्न सकिएन भने कसका कारण हुन सकेन उसलाई जवाफदेही बनाऔँ,” उनले भने, “सार्वजनिक सेवा प्रवाहमा सूचना प्रविधिको व्यापक प्रयोग गरौं । ई–गभर्नेन्सलाई राष्ट्रिय प्राथामिकतामा बनाऔँ ।”